Nunatsinni arsaattarneq neriunartoqarpoq
Pikkorissaanermi ilitsersuisartoq Morten Eskesen Nunatsinni angalaqqammivoq sungiusaasutut misilittagarpassuani tunniukkiartorlugit. Pikkorissarnermi peqataasut 15-it Tasiilameersut, Ilulissaneersut, Maniitsumeersut, Aasianneersut, Kangaatsiameersut aamma Ilulissaneersut nalaappaat siornatut putsertoq, taamaammat Upernavimmiit peqataasussaagaluit angumersinngitsoorput.
- Pikkorissarnerup nalaani nalunaaquttap akunneri aqqaneq marluk ilungersortarpugut qasoqalutalu innartarluta. Ukiut marluk matuma siorna aallartippunga assullu qilanaarpunga pikkorissarnerma aappaagu Danmarkimi nanginnissaanut. Klubbitsinni ulluinnarni sulininni iluaqutigisarpakka ilisimalersimasakka aammalu eqaarsaarnermi ilinniartitsisutut misilittakkakka, tassanissaaq atorluartarpakka sungiusaasutut pikkorissarninni pissarsiakka, Jakob Ludvigsen Kangaatsiameersoq pikkorissarnermilu peqataasoq oqaluttuarpoq.
Ilulissat timersortarfiani iluarsaanneqaqqammersumi atuagarsornertaa ingerlanneqarpoq illoqarfiullu arsaaffiani sungiusaanerit ingerlanneqartarlutik. Ulapaarnerit sila putserlunilu ilaatigut nittaattaraluartoq tamakku aporfiginagit ingerlanneqarput. Peqataasut tamaviaarput uanilu pikkorissarnermi pingasut B1-mik taaneqartartumi angusipput aappaagu B2-mik taaneqartartumut qinnuteqarsinnaallutik taannalu Danmarkimi pisussaavoq. Pingasut ingerlaqqittut tassaapput Charles Mølgaard, Aasiaat, Sakiu Lundblad, Nuuk aamma Jakob Ludvigsen, Kangaatsiaq.
- Ilulissani pikkorissarnerput Danmarkimi pikkorissartarnerat pitsaaqatigaat. Ilitsersuisup pikkorissup siunnersorluarpaatigut aamma qularutiginngilara peqataasut sungiusaasut siuarsarnissaannut iluaqutaalluarumaartut. Nunatsinni timersornermut tamanna pingaaruteqarluinnarpoq sungiusaasoqarniarnikkut imminut pilersulernissarput. Taamaasilluta meeqqat inuusuttullu kajumilersissinnaavagut peqatigiiffinni timersortalernissamut, Jakob Ludvigsen Kangaatsiami arnanut angutinullu sungiusaasoq oqarpoq.
