Nunatsinni aalisakkat amerlanerusut suliareqqaarneqartalissapput
Jens Immanuelsenip Siumumeersup paragraf 37 naapertorlugu apeqqutaanut akissummi tamanna atuarneqarsinnaavoq.
Qalerallit suliareqqaarnagit qeritiinnavillugit Nunatta avataanut annissorneqartut akitsuuserneqarnissaanik inatsit tunngavissiisussaq qaqugu saqqummiunneqassanersoq Jens Immanuelsenip apeqquteqaatigaa.
Aningaasaqarnermut Aatsitassanullu Naalakkersuisoq Andreas Uldum akissuteqarluni allappoq aalisakkanut tamanut nutaamik akitsuuseeriaaseqarnissamut inatsisissatut siunnersuut 2016-imi ukiakkut ataatsimiinnermi saqqummiunneqarnissaa naatsorsuutigineqartoq.
AAMMA ATUARUK RG: Aalisakkat tuneriaannanngorlugit suliarineqartarnerat aallartereerpoq
Naalakkersuisuni ilaasortap oqaatigaa, aaqqissuusseqqinnermi ilaatigut aalisakkat suliareqqaarneqartarnissaannut aalisarnermik inuussutissarsiutilinnut kajuminnerulersitsinissaq ilaatigut sulissutigineqartoq. Aalisakkanut akitsuusersuinerup nutarterniarneranut atatillugu qalerallit suliareqqaarnagit qeritiinnavillugit annissorneqartartut, akitsuuserneqarnissaat siunnersuutigineqartussatut ilanngunniarneqarpoq.