Nunatsinneersut unamminerit ammaanersiorneranni ajugaasut
Kalaallit angutit nunanut allanut assammik arsaannermi unammisartui unammersuaarneranni – PAN AM 2018-imi angerlarsimallutik Nuummi unammigamik pakatsisitsinngillat.
Assammik arsaattunik isiginnaariartortut ammaanersiornermi tivanermik, Nanookikkut appisimaarnerannik, nunat allat peqataasut takutitsinerannik kiisalu Julie Berthelsenip inuiattut erinarsuummik atuineranik takusassinneqarlutillu nuannaarutissarsitinneqarput.
Inussivimmi inunnik ulikkaaveqqasumi nunatta Colombia unammivaa. Nunatsinnit unammisartut aallaqqaataaniit naammassinissap tungaanut siuarsimapput. Unamminerup siulliup naanerani nunarput 18 – 11-mik siuarsimavoq.
AAMMA ATUARUK Tændt landshold klar til første kamp
Unamminermi unikkallarnerup kingorna kalaallit unammisatik qimalluavippaat, sivitsunngitsorlu 24 – 12-imik siuarsimalerlutik. Colombiamiut illersuinermi saassussinermilu periaatsiminnik kukkullattaarnerat kalaallit unammisartuisa iluaqutigilluarpaat, tamannalu Minik Dahl Høeghip unammisartullu sinnerisa atorluarpaat.
Unamminerup aappaata naammassiartornerani nunanut allanut unammisartut sungiusaasuata, Ingi Olsenip unammisartut siuarsimasortaat sipaarlugit sillimasut unammisippai. Nunarpullu 35 – 24-imik ajugaalluni.
Nunatsinnit unammisartut sapaammi unnukkut unammissapput, tassani nunatta Paraguay unammissavaa.