Nunatsiavumi naalakkersuisut siulittaasortaarput
Nunatsiavummi qineqqusaartut aallaqqaamut pingasuupput. Qinersisarnermili inatsimmi Inuktitut oqalulluarsinnaanissap piumasaqaataanera malinneqassasoq, aalajanngerneqarmat, qineqqusaartoq ataasiinnanngorpoq.
Nunatsiavummi naalakkersuisut siulittaasorisimasaat Sarah Leop Inuktitut oqaluppiarsinnaannginnini peqqutigalugu tunuartariaqarsimavoq.
Aamma atuaruk Canadami nunat inoqqaavisa oqaasiinik ilinniartitsinialersut
Nunatsiavut illoqarfiuvoq Canadamiittoq tassanilu naggueqatigiit Inuit 1950-imiliilli tuluit atuarfiinut angerlarsiaffiutigisunut atuariartortinneqartalersimanerat peqqutigalugu ikinnerusut kisimik Inuktitut oqalussinnaapput, taamaammallu Nunatsiavut tamakkerlugu oqaatsit ilitsoqqussat uummarissaqqinneqarnissaannut maannakkut misileraasoqarpoq.
Johannes Lampe Nunatsiavumi naalaakkersuisuni kultureqarnermut, sunngiffimmi aliikkutassaqarnermut, takornariaqarnermullu ministeritut inissisimavoq, illoqarfillu Nunaanngoq, tuluttut Nain, sinnerlugu qinigaalluni, qatanngutigiinnianilu palasiulluni.
Aamma atuaruk Canadami ministeriunerup naggueqatigiit Inuit naapeqatigai
Naak qineqqusaarnermi kiserngorukkaluarluni imaanngilaq atorfik ajornanngitsuaqqamik pissagaa, raadiukkummi oKâlaKatiget Society Radiomi (Oqaalaqatigiit Society Radio, aaqq.) apersorneqarluni ilumut Inuktitut oqallorissuunerluni uppernarsaqqaassavaa.
Taamaammat ullumi pingasunngornermi ajugaasutut aatsaat nalilerneqarsinnaavoq, pisortatigoortumillu Nunatsiavumi naalakkersuisut siulittaasuattut maajip sisamaani ivertinneqassalluni.