Nunat naalakkersuisui silap pissusianut tunngatillugu eqqartuussivilersuunneqartartut

Nunarsuarmi nunat naalakkersuisui amerliartuinnartut silap pissusiata allanngoriartornerata kingunerisai pillugit akisussaassusilimmik iliuuseqannginnerarlugit peqatigiiffinnit innuttaasunillu eqqartuussivinnut suliassangortinneqartarput.
Assimi takuneqarsinnaapput avatangiisinik illersuiniaqatigiiffimmit Greenpeacemeersut Danmarkimi akerliussutsimik takutitsisut Assi © : Greenpeace
septembarip 13-at 2017 13:52
Nutserisoq Simon Uldum -

Aviisi Information taama allaaserisaqarpoq.

Naalagaaffiit Peqatigiit Avatangiisit pillugit Pilersaarutaat, UNEP, naapertorlugu nunani 24-ni naalakkersuisut silap pissusianut tunngatillugu eqqartuussivimmut suliassanngortinneqarsimapput, 2014-imullu naleqqiullugit pingasoriaatinngorsimapput.

AAMMA ATUARUK Nunarput silaannarmik kissatsitsiartunnginnerusoq

Eqqartuussivimmut suliassanngortitsinerit katillugit 894-iupput, amerlanersaallu USA-mi ingerlanneqarput.

UNEP-imi pisortap, Erik Solheimip, nassuiaanera naapertorlugu ilaatigut ikummatissanik atuinermi aniatitsinerup silap pissusiata allanngoriartorneranut attuumassuteqarnerata ilisimatusarnikkut paasisaqarfigiartornerata peqatigisaanik nunat tigussaanerusunik inatsiseqalersimanerat suliassat eqqartuussisutigoortut amerleriaateqarnerannut pissutaavoq.

AAMMA ATUARUK G7-kkut Parisimi isumaqatigiissut pillugu isumaqatigiinngitsut

Tamatumunngalu peqatigitillugu naalagaaffiit amerliartuinnartut innuttaasutik ilaatigut peqqissuseq pillugu, aammalu erngup silaannaallu minguitsuunissaannut pisinnaatitaaffinnik amerlanerusunik tunisimavaat.

- Innuttaasut taamaalillutik naalakkersuisutik, aammali namminersorlutik ingerlatsisut, aniatitsisoqartarnerata millisarneqarnissaanut inuiaqatigiillu silap kianneruleriartuinnarneranut naleqqussartinnissaannut akisussaatinnissaannik periarfissaqalerput, Erik Solheim taama oqarpoq.

Nunallu naalakkersuisuinik silap pissusianut tunngatillugu suliat eqqartuussisutigoortut suli amerlanerulernissaat naatsorsuutiginerarpaa.

AAMMA ATUARUK Naalagaaffeqatigiit silap pissusia pillugu isumaqatigiissutit naammassiuminaatsikkaat