Nunat avannarliit siunnersuisoqatigiivi naalakkersuisumit peqataaffigineqanngitsut
Naalakkersuisuulersunili suleqatigiinnissamilluunniit isumaqatigiissummi Kalaallit Nunaata Nunanut Avannarlernut attaveqarnera eqqaaneqarsimanngilaq.
Taamaakkaluartoq Inuit Ataqatigiinneersoq Agathe Fontain Nunanut avannarlernut suleqateqarnermut naalakkersuisunngorpoq.
Nunat Avannarliit Siunnersuisoqatigiiffiata ukiumoortumik ataatsimiinnerani sapaatip akunnerani matumani ingerlanneqartumi Nunat Avannarllit suleqatigiinnerat sammineqassaaq.
Ataatsimiinneq Københavnimi marlunngornermiit ulluni marlunni ingerlanneqassaaq. Tassani nunat assigiinngitsut pisortaat Nunani Avannarlerneersut katersuutissapput Naalagaaffiit Peqatigiit 2030-mut anguniagassaat eqqartussallugit.
Tassanili Agathe Fontain peqataassanngilaq.
Tamatumunnga pissutaavoq Namminersorlutik oqartussat sapaatip akunnerata siuliani nalunaarutigimmassuk sapaatip akunnerani matumani Inatsisartut ataatsimiikkumaartut, tamannali kingorna allanngortinneqarpoq. Nunanut Avannarlernulli naalakkersuisoqarfimmi angalanissaagaluit taamaatinneqareersimapput.
Nunani avannarlerni suleqatigiinnermi takorluugai pillugit KNR-ip naalakkersuisoq apererusussimagaluarpaa, Agathe Fontainili apersorneqarsinnaasimanngitsoq naalakkersuisoqarfik nalunaarpoq.
