Nunat Avannarliit killiit ilisimatuussutsikkut suleqatigiinnerulissapput
Ilisimatusarfiup inooqatigiinnut ilisimatusaatinut ilinniarnermut atatillugu nunani avannarlerni killerni ilisimatusarfiit Norgemeersut, Islandimeersut Savalimmiuneersullu ukioq manna suleqatigilissavai, ilisimatusaatigalugu ilinniarfiit suleqatigiissutigineqartussat ukiaru periarfissanngortinniarneqarlutik.
Atlantikup avannaani suliassanut assigiinngitsunut tunngasunut ilisimatuussutsikkut sulianut nunat Atlantikup avannaani suleqatigiiffiat NORA aqqutigalugu aaqqissuunneqassapput. NORA tusagassiuutinut nalunaarummi taama allaaserisaqarpoq.
Nunani tamalaani aningaasaqarneq ineriartortitsinerlu pillugit suliniaqatigiiffiata OECD-p nalunaarusiornera aallaavigalugu inooqatigiinnut tunngasunut ilisimatusarfiit nunani avannarlerni killerniittut ilisimatuussutsikkut suleqatigiilissapput.
Nunani avannarlerni killerni oqartussat namminersortullu attaveqaqatigiinnerunerisigut tamaani suliassat ilungersunarsinnaasut kivinneqarsinnaanissaannut periarfissat pitsaanerulissasut OECD-p nalunaarusiaani ilaatigut atuarneqarsinnaavoq.
Nunanimi avannarlerni killerni nunat imminut ilisarisimasorujussuupput, suleqatigiissinnaanissaallu taamaammat periarfissagissaarluni.
Ilisimatusaatigalugu ilinniagassaq nutaaq Governance and Sustainable Management, tassa naalakkersueriaatsinut piujuaannartitsinissarlu pillugu aqutsinermut tunngasunut ilisimatusarneq nunani avannarlerni killerni ilisimatusarfiit suleqatigiissutiginiarpaat, ilinniartitsinerillu tuluttut ingerlanneqassallutik. Ilisimatusarsimasut pikkorissut nunamiiginnartinneqarnissaat, ilisimatusarusuttunillu ilinniartitsisunillu nunanit tamalaaneersunik kajumisitsilersinnaanissaq neriuutaavoq.
Inooqatigiinnut tunngasunut ilisimatusaat nutaaq NORA-p suliniutaanut Green Growthimut qanittuararsuussaaq, nunat avannarliit killiit piujuaannartitsinissaq pillugu ineriartortitsisoqarnissaanut suleqatigiinnerannut atassuteqassalluni. Ilisimatusarfiit Savalimmiuneersut, Islandimeersut Canadameersullu matumani suleqatigiipput.
