Nunat Avannarliit Katuami isumasioqatigiilerput
Qinikkat, inuillu kattuffinneersut, atorfilittallu Nunat Avannarliit ukiumoortumik isumasioqatigiissinneqarneranni Katuami aqagu peqataassapput.
Danmark Nunat Avannarliit Siunnersuisoqatigiivini sulinermi siuttuuvoq, Nunallu Avannarliit Siunnersuisoqatigiit præsidentiat Henrik Dam Kristensen, kalaallit Nunat Avannarliit Siunnersuisoqatigiivinut aallartitaasa siulittaasuannit Ineqi Kielsenimit Nunanullu Avannarlernut Suleqateqarnermut naalakkersuisumit Doris Jaobsenimit qaaqquneqarsimalluni.
Nunat Avannarliit Siunnersuisoqatigiivini sulinermi siulittaasoqarfiup pingaartitai pillugit peqataasut tamarmik ukiup aallartinneraniit ilisimatinneqarniassammata isumasioqatigiittoqarnissamut qaaqqusisoqarpoq.
Ålandip Savalimmiut Kalaallit Nunaatalu akornanni suleqatigiinnerup nakussassarnissaa siunertaralugu Nunanut Avannarlernut suleqateqarnermut naalakkersuisup Doris Jakobsenip Savalimmiuni Ålandimilu suleqatini isumasioqatigiinnermi peqataaqqullugit qaaqqusimavai.
Nunani Avannarlerni killeqarfinni akimmisaarutit amerlassusaannik ikilisaaniarneq pillugu nunat avannarliit suleqatigiinnerat isumasioqatigiinnerup immikkoortuata aappaani sammineqassaaq, peqataasut nunanit namminersorlutik aqunneqartunit pingasunit sulinermit tamatuminnga misilittakkanik tassani saqqummiiffigineqassapput, nunat taakku 2015-imi Killeqarfiit pillugit Siunnersuisoqatigiinni sinniisuutitaat saqqummiussissammata.
Kalaallit Nunaanni Hallo Norden, NAPA-mi ukiaq aallartittoq, aallartinnertik pillugu ukiunilu tulliuttuni suleriaaseriniakkatik immikkoortumi tassani saqqummiutissavaat.
Paasissutissiisarnerup annertusaavigineqarnissaa matumani siunertaavoq, angerlarsimaffimmiit suliffimmullu utertarlutik angalasartunut, inuillu nunamut avannarlermut suliartorpata, ilinniariartorpata imaluunniit soraarninngorlutik nuuttunut malittarisassat suut atuunnersut paasissutissiissutigineqassalluni.
