Nunarsuarput inuttusiartuinnassaaq

Naalagaaffiit Peqatigiit nunarsuup inoqassusianik siumut naatsorsuineranik New Yorkimi ippassaq saqqummiunneqartumi tamanna atuarneqarsinnaavoq.

Nunarsuarmi inuit ullumikkut 7,3 milliardiupput. ukiut 15-it qaangiuppata 8,5 milliardit sinneqalissaagaat naatsorsuutigineqarpoq 2050-imilu 9,7 milliardiussangatinneqarlutik.

Ukiumilu 2100-mi 11,2 milliardinngorsimassangatinneqarpugut.

Inuit amerliartornerat Afrikami annerpaajuvoq, Afrikami nunat 28-usut ukioq 2050 nallertinnagu marloriaatinngorsimanissaat naatsorsuutigineqarluni.

Naalagaaffiit Peqatigiit Silap pissusia pillugu ataatsimiititaliaata naliliinerani kingullermi 2014-imeersumi, silap pissusiata allanngoriartorneranut inuit amerliartornerat peqqutaaqataasutut tikkuartorneqarpoq.

Nunanilli siuarsarniakkanik ikiuiniaqatigiiffimmi Mellemfolkeligt Samvirkemi pisortap Helle Munk Ravnborgip inuit amerliartornerat immini ajornartorsiutaasutut isiginngilaa.

- Ajornartorsiutaarpiartoq tassaavoq nunarsuup pissarititaanik atuinerput taakkuninngalu agguataarinerput.

- Europamiut afrikamiunut naleqqiullugit nunarsuarmi pinngortitap pissarititaanik marloriaammik nungullarsaanerupput, amerikamiullu tallimariaammik, Mellemfolkeligt Samvirkemi pisortaq taama erseqqissaavoq.