Nunarput USA-mi sinniisuutitaqalissaaq
USA-mi sinniisuutitaqarfik USA-p Nunatsinni ukiorpassuarni sakkutooqarsimaneranik akuersaarnerusoq Berlingske Tidendemi allaaserineqarpoq.
Nunatta Washingtonimi sinniisuutitaqarfia Danmarkip Washingtonimi aallartitaqarfiata ataani inissisimasuussasoq, Naalakkersuisut siulittaasuata Kuupik V. Kleistip erseqqissaatigaa:
- Nunattali nammineq akisussaaffeqarnerulernissaanut ineriartornermik qaquguugaluarnersorlu namminersulivinnissaanut alloriarneruvoq, Danmarkimillu isumaqatigiissuteqarnikkut tamanna pilluni, Kuupik V. Kleist Berlingske Tidendemut oqarpoq.
Nunatta nunani arfineq-marlunni allani sinniisuutitaqalernissaa Nunatsinnit eqqarsaatersuutigineqarpoq, taakkununnga ilaallutik Canada, Rusland, Japan kiisalu Korea Kujalleq eqqarsaatersuutigineqarluni.
Nunatta Bruxellesimi sinniisuutitaqarnermi saniatigut Danmarki aqqutigalugu nunani tamalaani sinniisuutitaqartutut inissisimavoq, USA-milu sinniisuutitaqalernissamut pilersaarutit Danmarkimi taamaammat uissuummissutigineqarlutik.
Nunanut allanut politikkip Danmarkimit suli aqunneqarnera, Danmarkip nunanut allanut tunngasunut ministererisimasaata Per Stig Møllerip eqqasitsissutigaa:
- Kalaallit Nunaata nunanik allanik niueqateqarnini nammineq aqukkumaarpaa, allaanngilarli nunanut allanut politikkimik nammineq aqutsiniarsarisarisoq. Inatsilli tunngaviusoq naapertorlugu tamanna naalagaaffimmit ingerlanneqartussaavoq, USA-mik politikkeqarnissartik taamaammat nammineq aquttussaanngilaat, Per Stig Møller Berlingske Tidendemut oqarpoq.