Nordic Futsal Cup: Nunarput siuarsimareerluni unammineq naligiinnermik inerneqarpoq

Kalaallit angutit futsalimik unammisartut Danmarkimi angutit futsalimik nunanut allanut unammisartui tallimanngornermi unammineranni naligiillutik naammassipput.
Allattoq Kenneth Elkjær
decembarip 08-at 2017 13:47

Kalaallit futsalimik unammisartut Nordisk Futsal Cupimi Norgemi ingerlanneqartumi Danmarkimut tallimanngornermi unammigamik pointi siulleq pissarsiaraat.

Kalaallit nunanut allanut unammisartuisa unamminerup siulliup inerneratut unamminertik naammassinngimmat ugguutigilaassagunarpaat. Unamminermi siullermi kalaallit 2-0-imik siuaqqapput, unamminerullu aappaani iluatsitsilluaqqanerat mumippoq, Danmarkillu isertitsinerit marluk minutsit 20-t ingerlanerani iluatsippai.

Kalaallit angutit futsalertartut pissartanngorniuunnermi taamaalillutik Finlandimut Sverigemullu ajorsareerlutik, pointimik siullermik iluatsitsipput.

Kalaallinit isertitsinerit Morten Fleischerimit Ari Hermannimillu isertinneqarput. Kalaallit Norgemut arfininngorpat unammissapput.