Nunatsinni tupa taamaatipparput

Naalakkersuisut nittartagaanni tamanna allaaserineqarpoq.

"Qitornat tapersersoruk pujortarfiunngitsumik inuuneqartillugu - Oqaloqatigiittaritsi". Taama qulequtserlugu Naalakkersuisut angajoqqaanut kaammattuuteqarput, qitornamik oqaloqateqartarnissaat kaammattuutigalugu:

- Uagut inersimasuusugut akisussaaffigaarput periarfissaqarlutalu qitornatta peqqissumik pitsaasumillu inuuneqarnissaannut sunniuteqassalluta, minnerunngitsumik tupa, imigassaq, aalakoornartoq, allallu aanngajaarniutit eqqarsaatigalugit, Peqqissutsimut naalakkersuisoq Doris Jakobsen tusagassiuutinut ilaatigut taama allaaserisaqarpoq, sapaatillu akunnerata 22-p pujortarfiunnginnerani inersimasut meeqqat inuusuttullu peqqissusaannut akisussaanerat maluginiaqqullugu, "Oqaloqatigiittaritsi"-mik qulequtserlugu:

- Oqariartuutigut piuminartuupput iliuuseqarnissamullu tikkuussisuullutik. Qitornat piffissamik atueqatigiuk. Qitornat oqaloqatigiuk - tupa aalakoorniutillu pillugit. 

-Qitornat tapersersoruk; sunngiffimmi susassaqartillugu. Siunnersuutit malikkukkit, qitornat tapersersussavat inuusaatsimik peqqinnartumik atugaqarnissaanut, Doris Jakobsen oqarpoq.

Nunatsinni sumiiffinni assigiinngitsuni sapaatip-akunnerata 22-p ingerlanerani pujortalinnginnissaq pillugu sammisitsisoqartassaaq, paasissutissallu Peqqik.gl iserfigalugu sukumiinerusumik paasiniarneqarsinnaapput.