Nunarput ornitassatsialattut allattorsimaffimmiilersoq

Fodor tassaavoq angalanissanut tuluttut paasissutissanik allattorsimaffiit annersaat, Fodors Go List 2018-imut silarsuarmi alianaannersat 50-it allattorsimaffigaat. Visit Greenland tusagassiuutinut allakkamini taama nalunaarpoq.

Allattorsimaffik taanna angalasunut misilittagaqarusuttunut, ornitassanik immikkuullarissunik pingaartitalinnik isumassarsiorfiusartoq, Visit Greenlandimi pisortaagallartoq Lykke Geisler Yakaboylu oqarpoq Kalaallit Nunaat tassuuna assut pingaarutilimmik nittarsaanneqartoq.

- Kalaallit Nunaat tusagassiisarfimmit tatigisaasumit ornittariaqartutut taaneqarmat. Nunarsuarmi ornitassatut taama nuannertigisumik eqiingaffigineqarneq Kalaallit Nunaat sinnerlugu nuannaaqaagut. Taama soqutiginnilersitsinissamut ussaasaarutit naliginnaasut atorlugit akilersinnaasimassanngikkaluarparput.pisortaagallartoq oqarpoq.

Tusagassiortup ukkatarinninnera allattorsimaffinniilersitsisoq

Visit Greenland oqaluttuarpoq Kalaallit Nunaata Go List 2018-imi eqqartorneqarsimanera allanneqarsimasoq Lola Akinmade Åkerstrømimit, taanna tusagassiortuuvoq assiliisartuulluni akissarsitinneqartarsimasoq.

Visit Greenlandip aamma Air Greenlandip Åkerstrøm 2017-imi upernaakkut Nuummi Ilulissanilu “Greenland Food Adventure” -mi peqataanissaanut immikkut peqataatippaat. Tusagassiortup kalaallit igaffiat, nerisassioriaasaat, ukiukkullu sammineqartartut taamani ukkatarai.

Visit Greenland naapertorlugu tusagassiortup taamani angalasimanera taanna pisuuvoq Kalaallit Nunaat maanna allattorsimaffimmi ataqqineqaqisumiilermat.

- Ingammik Air Greenland suleqatigilluaratsigu, aammali piffinni assigiinngitsuni takornariartitsisut tusagassiorfiit nunat assigiingitsut akornanneersut Kalaallit Nunaat tutsuviginartumik eqqartortarmassuk paasinarpoq sunniuteqarluarsimasoq; tamannalu ukiuni kingullerni arlalinni kisitsisit atorlugit naatsorsuutit ersersikkaat, Lykke Geisler Yakaboylu oqarpoq.

Kalaallit Nunaat ukiuni kingullerni allattorsimaffinni ilisimaneqartuni arlalinni ilannguneqarsimavoq, soorlu National Geographic’s Best Trips 2016 og Lonely Planet’s Best in Travel 2016.

Fodor’s Go List 2018 uani takuneqarsinnaavoq: Fodors Go List. Nunarput allattorsimaffimmi normu 45-miippoq.