ASSIT Nunatsinneersut tuniniagassanik Kinami pilerisaarisut
Tikeraarnerup siunertaraa nunatsinnit nioqqutissiassat, soorlu puisit amii aamma aalisakkat tunisassiarineqartut pilerisaarutigineri. Tamakku saniatigut ingerlatseqatigiiffinnik, ilaatigut aatsitassarsiornermut suliassaqarfinnik, takornariarnermi suliffeqarfinnik aammalu aningaasaliinissamut aningaaserivinnik atassuteqartunik arlalinnik ataatsimeeqateqartoqassaaq.
Vittus Qujaukitsup illoqarfimmi Rinzaomi suliffissuaq, Royal Greenlandimik suleqateqartoq marlunngornermi novembarip aappaani tikeraarpaa. Tikeraarnermi nunatsinnit aalisakkanik qalerualinnillu, ilaatigut qaleralinnik, kinguppannik saattuanillu suliaqartarnerinik saqqummiussisoqarpoq.
Tassunga atatillugu Vittus Qujaukitsoq erseqqissaavoq; ”allaanerusumik assullu kusanartumik ilusilimmik nunatsinnit nioqqutissiassat qanoq suliarineqarlutillu Kinami niuerfigisanut siammartitertarnerat ilinniagaqarfiuvoq”.
Aallartitat illoqarfimmi Qingdaomi ulloq taanna kingusinnerusukkut aaqqissuussinermut peqataapput, tassani Kinalu niueqatigiinnerminnik ukiut 20-nngortorsiornertik Royal Greenlandip aamma Polar Seafoodip malunnartippaat. Vittus Qujaukitsoq aaqqissuussinermut qaaqqusisuuvoq, tassani nunatta imartaanit tunisassiarineqartut Royal Greenlandimit, Polar Seafood Greenlandimit, North Atlantic Seafoodimit, Arctic Prime Fischeriesimit Iceberg Seafoodimillu tunissutaasut kusanartumik sassaalliutigineqarlutik.
Illoqarfimmi Chongqingimi Food & Fashionimi sapaatit-akunneranni kingusinnerusukkut takutitsinissami Great Greenland peqatigalugu puisit amiinik tunisassianik pilerisaariniarluni peqataasoqassaaq. Aallartitat arfininngorpat angerlamut utissapput.
