Nunarput Instagrammimi iluatsitsilluartoq
Visit Greenlandimi nunani assigiinngitsuni takornariaqarnermut siunnersuisoqatigiit Instagrammimik 2016-imi atuillaqqinnerpaat qulingiluat akornanniippoq. Suliffeqarfik inniminniinernik nittarsaassinermillu ineriartortitsinermik suliaqartoq, Trek Soft, taama naliliivoq.
Naliliinerlu naapertorlugu, Visit Greenland assinik nunattalu takornariarfissatut nittarsaassinermini aliannaarsaartitsisarnini pissutigalugu Instagrammimi iluatsitsilluarpoq.
Hashtaggip #GreenlandPioneerip Nunatta qanoq inneranik immikkut ittumik takutitsisarnera Trekk Softip immikkut taavaa.
- Nuna paasisassarsiorfigineqarsimanngitsoq nunarsuup avinngarusimasuaniittoq, takornarianut tamanut siullersaalluni tikittutut misigisaqartitsisoq.
Tamannalu pissutigalugu Trekk Soft isumaqarpoq Visit Greenlandip takornariat sorliit pilerisaassanerlugit aammalu Nunatsinnut pigunik qanoq misigisimassanersut angalanerminnilu assilisaminnik siammarteriumaarnerat ilisimaarilluaraa.
Visit Greenlandimi Social Mediamut akisussaasup Arina Kleistip toqqarneqarnertik nuannaarutigaa:
- Instagrammimik hashtaggimillu #GreenlandPioneerimik atuinitta maluginiarneqarsimanera paasillugu assut nuannerpoq.
- Taamatut suliaqarnerput Nunatta nittarsaannerani ilisarnaatigisatsinnut "Pioneering Nation"-imut attuumassuteqartupilussuuvoq, taannami Nunatta takornariarfissatut nittarsaannerani qiutillugu oqaluttuarisarparput, tusagassiorfinnut nalunaaruteqarluni taama allappoq.
