Nunatsinni naalakkersuinikkut ingerlatsineq sapaatit-akunnerata siuliani piterarsiorfiusut taaneqarsinnaavoq. Aleqa Hammondip pisortat aningaasaataannik atornerluisimanera Nunatsinni naalakkersuinikkut ingerlatsinermi ilungersornartorsiornerit annersaasa ilaannik kinguneqarpoq. Taama ajortigisumik pisoqarsimasinnaanera immikkut sammissavarput. Angalanernut apersortittoornermullu aningaasat 106.000 koruunit atorneqarsimanerat Naalakkersuisut ajalusoornerannut sooq pissutaarpiarpa?
Uatsinnullu qanoq kinguneqassava? Mamianartuliornerup kingorna Nunatsinni qanoq avissaartuuttoqartigiva, aamma naalakkersuinikkut ingerlatsinerup ukiap annersaani unikaallatsinneqarnera qanoq sunniuteqassava?
Oqallinnermik aallakaatitassiatsinni, Qulaarpaa, KNR TV-kkut sisamanngornermi oktobarip qulingiluaani, kalaallisut nal. 19.30, danskisullu nal. 20.30 aallakaatinneqartussami, apeqqutit tamakku ilaatigut sammineqassapput.
Pisumut tunngatillugu paasissutissat tunuliaqutaasullu quppernermi uani atuarneqarsinnaapput.