VIDEO Nunarput Danmarkilu Urani pillugu isumaqatigiipput
- Tassa soorunalimi pingaaruteqartorujussuuvoq aammalu isumannannerpaamik suleriaaseqartoqarnissaanut pingaaruteqarluinnarluni uku isumaqatigiissutit sisamat, inuussutissarsiornermut naalakkersuisoq, Randi Vestergaard Evaldsen KNR-imut taama oqarpoq.
Inatsisit pisariaqartut Folketingemi Inatsisartunilu upernaap ingerlanerani akuersissutigineqassapput.
Uranip kisermaassillutik naalakkersuisunut peqqarniisaarnianullu anngutinnginnissaanik nakkutilliinermut tunngatillugu Danmark inaarutaasumik akisussaasuuvoq.
Aamma atuaruk Ilisimatooq: Uranimik tuniniaalinnginnermi suliassarpassuaqarpoq
Kisianni Nunarput annertuumik aamma akisussaaffeqarpoq.
- Suleriaatsit aallarnerneqartussat ataatsimoorussamik suliniutigineqassasut nalilerpara. Susassaqartut arlaannaalluunniit kisermaassillutik iliuuseqarsinnaanngillat. Killiffik taanna anguniarlugu ukiuni marlunni isumaqatigiinniartoqarpoq, immikkut ilisimasalik Cindy Vestergaard TV2-mut nassuiaavoq.
Inatsisartunilu nunanut allanut sillimaniarnermullu ataatsimiititaliami ilaasortap, Danmarkip Nunattalu akornanni isumaqatigiissut ilumut Nunatta soqutigisaanik illersuinersoq apeqquserpaa.
- Isumaqatigiissutit Inatsisartuni minnerpaamik eqqartorneqaqqaarsimasariaqaraluartut. Aammalu soorunami innuttaasut peqataatinneqarsimasussaagaluartut, Sara Olsvig, Inuit Ataqatigiit, KNR-imut oqarpoq.
Aamma atuaruk Uran pillugu Danmarki akisussaaffeqassaaq
Isumaqatigiissummi nunatta oqartussaaffii soqutigisaalu naammattumik illersorneqarsimanersut apeqquserneqarpoq. Uranimillu ilisimasat annertunerusinnaaneri aamma ersarissarneqarlutik.
- Takusinnaavarpullu taamanikkulli Naalakkersuisut politikkikkut isummernerat amigartoq aammalu politikkikkut kingunissai sukumiisumik qulaajarneqarsimanngitsut, Olsvig oqarpoq.
Aamma atuaruk Uran pillugu mianersortoqarnissaa Olsvigip nalunaarutigeqqippaa
Danmarkip Nunattalu akornanni isumaqatigiissuteqarneq, Nunatta akisunaassanngippagu qulakkeerisoqartariaqarsorineqarpoq.
- Uani pineqartumi Namminersorneq eqqussimasarput akigalugu uranisiortoqannginnissaa qulakkeertariaqarparput. Tamannalu Inuit Ataqatigiinniit erseqqissassavarput, oqaatigalugu Namminersorneq akigineqassanngilaq uani, Nunanut allanut sillimaniarnermullu ataatsimiititaliami siulittaasup tullia, Sara Olsvig, Inuit Ataqatigiit, KNR-imut oqarpoq.
Isumaqatigiissutip atsiorneqannginnerani Inatsisartuni suliarineqaqqaassasoq taasissutigineqaqqaassasorlu Inuit Ataqatigiit piumasaqarlutik tusagassiutinut nalunaarput.
Aamma atuaruk Nunatta Danmarkillu uranimik avammut niuernissaq isumaqatigiissutigaat
