Paasisat nutaat: Nunarput annertusiartorpoq
Sorsunnersuup aappaani amerikamiut sakkutuuisa assilisaatitoqaat ikiorsiullugit nunatta sineriaani 80-ikkunni assilisat maannamullu Google Earthikkut assilisat ilisimatuunit sanillersuunneqarsimapput.
Assillu nutaanik paasisaqarfiupput.
Silap kiassusiata qaffakkiartornerani sermeq aakkiartorpoq, taamaalineratigut nunap sineriaatigut arlalinnik nunaminertaqalerpoq kuussuillu akui amerliartuinnarlutik.
- Paasisatta inerneri nutaat naapertorlugit tupaallannartumik paasisaqarpugut, Kalaallit Nunaat portussutsimigut taamaallaat alliartunngitsoq aammali atitussutsimigut annertusiartortoq paasivarput, biologi statistikerilu, Lars Lønsmann Iversen inernerit pillugit atuagassiamut ataqqisaasumut Naturemut saqqummiunneqartumut taama oqarpoq.
Kuussuit akuisa amerliartornerat pissutigalugu ilaatigut umiarsualiviit naqqi sioraqarnerulerput, tamannalu aalisartut umiarsuillu takornariartaatit talittassinnaanerannut akornusersuutaavoq.
Sioranikkiatornerali aamma iluaqutissartaqarsinnaavoq, sioqqammi nunarsuaq tamakkerlugu amigaatigineqarlutik piumaneqarput, taamaammat Kalaallit Nunaannut avammut nioqqutissatut periarfissaalluarsinnaapput, Politiken taama allaaserisaqarpoq.
