Nunaqarfinni isertitsiveqalernissaq politiinit taperserneqanngilaq
Danmarkimi politiit pillugit Folketingimi amerlanerussuteqartut novembarimi isumaqatigiissutaannit aningaasaliissutit qanoq agguataarneqassanersut, Naalagaaffiup politiivisa ulluni makkunani inisittuleruttorpaat.
Nunaqarfiit isertitsiveqanngitsut peqalernissaannut aningaasaliisoqassasoq Siumumit folketingimi ilaasortaq Aleqa Hammond isumaqarpoq.
Aamma atuaruk Nunaqarfinni inatsisitigut atukkat politikerit isornartorsiorpaat
Aningaasalli allanut atorneqassasut Kalaallit Nunaanni politiit peqatigiiffianni siulittaasoq Finn Jeppesen isumaqarpoq.
- Politeeqarfiit nunatsinniittut qimerlooraangakkit, illuutit pitsanngorsaavigineqarnissaannut aningaasaliinissaq Kalaallit Nunaanni politiit peqatigiiffiani siulittaasutut silatusaarnerusutut isumaqarfigaara, Finn Jeppesen oqarpoq.
Kommunefogedit isertitsivittaarusullutik kissaateqarnerat politimesterip paasisinnaalluarpaa. Isertitsivinnilli sanaartortitsisoqarnissaanut pisariaqartitsineq naammanngitsoq isumaqarpoq.
- Isertitsiviliortitsinermut aningaasartuutigineqartussat nalingi aamma oqimaaqatigiisinniartariaqarpakka. Isertitsivimmik ataatsimik sananeq millionimik imaluunniit millionit marluk akeqariaannaavoq. Nunaqarfinnilu ataasiakkaani isertitsivimmi unnuisitsinissaq qaqutikkut pisariaqartinneqartarmat, aningaasat taakkua atorlugit inuiaqatigiit pinerluttaalisitsisunit kiffartuunneqarsinnaanerusut isumaqarpunga, Bjørn Tegner Bay oqarpoq.
Aamma atuaruk Politimesteri: Nunaqarfinni inatsisitigut isumannaatsumik inissisimasoqarpoq