Nunaqarfinni innuttaasut meeqqat atugaannut aaqqeerusussuseqarput
Meeqqat Illersuisuata Qaasuitsup Kommuniani illoqarfiit marluk nunaqarfiillu 16-it tikeraarnerani nunaqarfinni innuttaasut peqataarusussuseqarnerat qujamasuutigaa.
Allattoq Ivik Kristiansen
- Meeqqat, inuusuttut, inersimasut, utoqqaallu naapitagut oqaloqatigisagullu meeqqat atugaannut annertuumik pitsanngueqataarusussuseqarput, Meeqqat Illersuisuat Aviâja Egede Lynge oqarpoq.
Meeqqat inuusuttullu 1300 tungaanut naapippaat. Taakkulu saaffiginnissutaat inersimasullu aamma saaffiginnissutaat nalunaarusiami atorneqarput, nalunaarusiarlu taanna Qaasuitsup Kommunianut nassiunneqarluni.
Meeqqat Illersuisuat nunaqarfinni meeqqat atugaat naligiimmik iliuuseqarfiginissai kissaatigai, taannalu anguniarlugu 2016-mi nunaqarfiit immikkut sammineqarnissai aalajangiusimavaa.