Nunaqarfinni aqutsisut ikilineqarneri ernumanartinneqarpoq

Kommune Kujallermi nunaqarfinni aqutsisut siornatigut aqqaneq marluusimasut maanna sisamaannanngussapput, tamarmik immikkut pingasunik inuttallit. Nunaqarfiit Aappilattoq, Tasiusaq Narsaq Kujallerlu ataatsimoorussamik aqutsisoqalerpata nunaqarfiit ilaat isertitoqanngitsoorsinnaanerat Aappilattumi qinigassanngorteqqittup ernumanartoqartippaa.

- Imaasinnaavoq Aappilatormiiut marlunnik isertitaqartut imaluunniit Narsarmiut marlunnik isertitaqartut. Isumaqarpunga suleriarnissatsinnut ilaatigut nukillaanngunaqutaasinnaasunik nassataqarumaartoq. Ullumikkut Immitsinnut tassanngaanartumik oqaloqatigiissinnaasarpugut kisianni tamanna mattunneqartussaavoq tassami attavigisartakkavut peertussaammata. Tassuunaatigullu ernumanarpoq, Niels Manassen qineqqusaartoq oqarpoq.

Kanunupe'p siulittaasuat Jens Kristian Therkelsenip ullaaq radioavisimut oqaatigaa isumalluarluni nunaqarfinni aqutsisut akisussaaffeqarnerulissammata. Tamannali Aappilattuni nunaqarfimmi aqutsisut siulittaasuata isumaqatiginngilaa.

- Siornatigulli suleriaaserput annaasussaavarput. Tamatta immikkut nunaqarfikkuutaarluta soqutigisarput tassani aamma annaasussaavarput, una pissutigalugu nunaqarfiit ataatsimoortut soqutigisaat tassani soqutigilertussaavagut, naak siornatigut taamatut suleqatigiittarneq soorunami kommunalbestyrelsep iluani imaluunniit nunaqarfimmi aqutsisut ataatsimooraangatta ataatsimut isumagisaat katiterneqartarmata. Tassuunatigut immitsinnut naapperataarsinnaanerput amigalertussaasasoq, oqarpoq Aappilattuni nunaqarfimmi aqutsisunut siulittaasoq Niels Manassen.

Nunaqarfinnut aqutsisunut qinersinermi kingullermi 2005-imiit 2009-mut nunaqarfinni aqutsisut 54-upput. Qinersineqqinnermilu aqutsisut 26-iulissapput.