VIDEO Nunaqarfimmi eqqagassalerineq anartaajaanerlu ajornartorsiutaasut
Qaammatini sisamani anartaajaasoqaranilu eqqaavilersoqarsimannginnerata nunaqarfik takussunarsitippaa, nunaqarfimmiullu naammagittarunnaarput.
- Anartarfiit illut akornanni koorortannguanut kuerartarpagut nammineq, Anna Ottosen KNR-imut taama oqaluttuarpoq.
Eqqagassat katersuutiinnartut bakteerianittarput, eqqagassalerisullu nalinginnaasumik tamakkununnga akiuussutissamik kapineqartarput. Illorsuarmiulli nammineerlutik anartaajaasariaqartarput eqqagassallu eqqaavissuarmi nunaqarfimmit kilometerip affaanik ungasitsigisumi ikuallattarlugit. Tamannalu peqqissutsikkut ajornartorsiutinik pilersitsivoq.
- Quersuunnersuaq, naarluunnersuaq, timminnersuaq. Taakku atugarigatsigit aasarli, immaqa upernaarli, Anna Ottosen oqarpoq.
Qaasuitsup Kommunia Illorsuarni anartaajaasussanik pissarsiniarsimagaluarpoq iluatsitsinanili.
- Inuit sulilertaraluartut ingerlaannaq unittarsimapput. Anartarfilerisuunermit eqqaavilerisuunermillu allaanerusunik suliaqarusuttarput. Taamaattumik sulilersitsiniarneq ajornakusoorsimavoq, Jens Mikkelsen, Qaasuitsup Kommuniani sanaartornermut avatangiisinullu pisortaq taama oqarpoq.
Nunaqarfimmi aqutsisut suleqatigalugit ajornartorsiut aaqqinniarneqartoq kommunimit oqaatigineqarpoq.