Nunaqarfik Attu sapaatip akunnerini pingasuni imeqanngilaq
Attumi meeqqivimmi Alliami, igaffimmi ningiup, Nikoline Filemonsenip tamanna qanimut misigaa.
- Iggavimmi ningiulluni eqqiaasuullunilu nuanninngilaq maani imermik amigaateqartarnerput, tamanna nukillalaarnarpoq sualummik issittorsuunera eqqarsaatigigaanni.
Nikoline Filemensenip oqaluttuaraa, meeqqivik Alliaq, kommunimi sulisunit maanna imertaanneqartartoq.
- Nammineerluta imertartaraluarpugut, taamaaliortarluta suliffitta nakkutiginerata nalaani. Qujanartumilli maanna kommunimit imertartoqartarpugut ataasinngornikkut, pingunngornikkut tallimanngornikkullu. Tamanna iluaqutaagaluarpoq kisianni imermik sipaaniarnartarnermik, Nikoline Filemonsen oqarpoq imalu nangilluni.
- Qaqqat pingasut ituillugit tatsimut maanna imertartoqartarpoq. Assut ungasippoq ingammik issittorsuunera eqqarsaatigigaanni imertartartugut tujormisarunarput issittorsuunera pissutigalugu.
Nukissiorfinnit oqaatigineqarpoq, Attumi Peqqinnissaqarfik Nukissiorfiit sulisuinit maanna imertaanneqartartoq.
Nikoline Filemonsenip neriuutigaa qanittukkut imeqaqqilerumaarlutik.
- Ullorli manna tikillugu suli tusartinneqanngilagut imeqarnitta qaqugu aaqqinneqarnissaa pillugu.
Attup meeqqeriviani Alliami igasoq eqqiaasorlu, Nikoline Filemonsen taama oqarpoq.
Aasianni Nukissiorfimmi nunaqarfinnik sullissisut ittua, Peter Frederik Petrussen KNR-imut oqarpoq, Nukissiorfiit qulimiguulimmik maanna attartortut, naatsorsuutigalugulu Attumukarumaarlutik aqagu. Peter Fredrik Petrussenip naatsorsuutiginerarpaa, Attormiut sapaatip akunnerata tulliup aallartinnerani imeqaqqilerumaartut.