Nunaqarfiit illoqarfiillu siornatigut takusimanngisatit Googlemi takusinnaalissavatit
Assilisat juunip qaammataani assilineqarput qaammatillu marluk pingasulluunniit qaangiuppata nittartaakkami inuppassuarnit alakkarneqartartumi Google Street Viewimi takuneqarsinnaalissapput.
Misissueqqissaartarfimmi Asiami nunamik uuttortaasartut pingasut aasap ingerlanerani paarlakaajaallutik assiliipput.
Assiliissut 15-nik assiliissutilik sammivinnik assigiinngitsunik assiliisinnaasoq atorneqarpoq taanna 25 kilosut oqimaatsigivoq.
Assiliissut illoqarfinni nunaqarfinnilu tamani angallanneqarpoq taakkua tikinnginnerini assiliisoqarpoq, siornatigut taakkununnga tikissimanngitsut ilikkarniassammassuk.
Pisulluni aamma biilinik kiisalu angallatit atorlugit assiliisoqarpoq, Eva Matzler Asiami nuna assiliortartoq aamma assiliissummik nammalluni assiliisimasoq oqaluttuarpoq,
Aamma atuaruk
Sapaatit akunneri marluk pingasut atorlugit nuna assiliorpugut nittartakkami Google Street View-imi assit atorneqartussat assiliitigalugit, Eva oqaluttuarpoq.
Kalaallit Nunaanni assilisat nittartakkami Google Street View-imiittut nuannarineqartorujussuupput, taakkua pillugit Asiaq nunarsuarmit tamanit saaffigineqartarpoq.
Tuluit Nunaanni nutaarsiassaqartitsivik BBC assilineqarsimasunik soqutiginnillutik Asiamut saaffiginnipput aamma nunanit assigiinngitsunit ilaatigut Brasiiliamit, Itaaliamit aamma Australiamit saaffigineqartarpugut Eva Matzler oqarpoq.
Assilineqartut Kalaallit Nunaanni illoqarfiit nunaqarfiillu siornatigut takuneqarsimanngitsut imaluunniit sivisuumik takuneqarsimanngitsut isiginnaarneqarsinnaapput, aqqusinikkullu pisulluni assilisat siumut sanimut takimullu assilineqarsimasut isiginnaajutigalugit illoqarfimmi nunaqarfimmiluunniit ingerlaartoqarsinnavoq.
Assilisat nittartakkami Google Street Viewimiittut, uagutsinnuinnaq iluaqutaassanngillat, nunarsuatsinnili tamani aamma atorluarneqarsinnaapput. Eva Matzler isumaqarpoq assilisat nutaat Kalaallit Nunaat pillugu ilisimasanik annertunerusunik pissarsiffiussasut. Sulimi ima isumaqartoqarmat Kalaallit Nunaat inoqanngitsoq, Eva Matzler Asiami nunanik uuttortaasartoq oqarpoq.