Nunap inoqqaavisa Naalagaaffiit Peqatigiinni alaatsinaattunngornissaat kissaatigigaat
Issittormiut tassaapput nunani avannarlerni saamit inatsisartuinit aallartitat, saamit aamma inuit inuusuttaasa suliniaqatigiiffii, kiisalu inuit Nunatsinneersut, Alaskameersut, Chukotkameersut Canadameersullu, ICC-kkoortumik peqataasut.
Ataavartumik Oqaloqatigiittarfimmi nunap inoqqaavinit kaammattuutigineqartut pisariusumik arriitsuaqqamillu suleriuseqarluni Naalagaaffiit Peqatigiit ataatsimeersuarnerannut ullumikkut apuunneqartarput.
Issittormiullu kissaatigisaat tassaavoq nunap inoqqaavisa Naalagaaffiit Peqatigiit ataatsimeersuarneranni toqqaannartumik sinniisuutitaqalernissaat, sulianilu imminerminnut tunngasuni apeqquteqarnissaminnut periarfissaqalerlutik.
Tamanna pilertornerusumik toqqaannarnerusumillu sunniuteqaqataanissamut aqqutissiuissaaq, Hjalmar Dahl, ICC Kalaallit Nunaanneersoq, KNR-imut taama oqarpoq.
Siunnersuut maanna suliarineqarpoq Naalagaaffiit Peqatigiinnullu ukiaru isumaqatigiinniutigeqqinneqassalluni.