Nunanut allanut unammisartut nunatsinniittut amerlanerunerat akisussaassuliineruvoq

Kalaallit assammik arsarlutik nunanut allanut unammisartui amerlanerit nunatsinni klubbineersuupput. Taakkunannga sisamat  Danmarkimi assammik arsartartut klubbianniillutik.

Ineriartorneq taanna klubbinut kalaallit nunaanniittunut annertuumik akisussaaffimmik tunisivoq, piukkunnaatillit arlallit tamaani unammisartuummata, nunanut allanut sungiusaasoq Niels Møller oqarpoq.

 - Kalaallit arsartartui annertuumik nersugassaapput, taamaakkaluartoq kalaallit nunanni assammik arsartartut kattuffiata pilersaarutai aallarteriikkat malinnissaannut klubbinut akisussaaffimmik annertuumik tunniussisuuvoq, nunanut allanut sungiusaasoq Niels Møller oqarpoq.

Aamma atuaruk Nunanut allanut unammisartut sungiusaasuata piginnaanillit nutaat isumalluarfigigai

Taassuma oqaatigaattaaq, kattuffik pisussanik arlalinnik pikkorinnernut nukittorsaataasussaq aallartitsereermat.  

- Kalaallit klubbiisa pitsaassusaat aamma  qaffassarnissaat anguniagaavoq, taamaaliornikkut nunanut allanut unammisartut pitsaassussaat qaffassammat.

Kalaallinut arsartartunut nalinginnaasuuvoq unammisaminnit nukilaannerusarnerat tamannalu  ajornartorsiutaavoq . Tamannali aaqqinniarneqarpoq.

- Nukittorsarnissamut aaqqissuussamik maanna ingerlatsisoqarpoq. Kalaallit piukkunnaatillit 14-nik 15-nillu ukiulinniit nukassarnerat aallartisarneqarpoq.  Nunarsuarmimi pissartanngorniunnissanut kalaallit nunaat anngussinnaanera periarfissaammat, Niels Møller oqarpoq.

VM-lu tassaavoq anguniakkat annersaat. Tamanna amerikap nunavittaani assammik arsarluni unammersuarnerni anguneqarsinnaavoq, Argentinamilu 2015-mi ingerlanneqassalluni. Piumasaqaat tassaavoq pikkorinnerit pingasut akornanni inissinnissaq VM-mut annguttoqassappat.

Unammisassallu sakkortoqaat, Kalallit nunaanniillu unammisartut nunat assammik arsartartullit annerusut pikkorissorsuit unammisassaannut ilaapput.

Niels Møllerillu neriuutigaa, Kalaallit Nunaat 2018-mi namminneq unammisarfimminni unammilerunik periarfissagissaarnerussallutik.  Tassami kissaataavoq, Amerikap nunavittaani assammik arsarluni unammersuarneq Nuummi 2018-mi ingerlanneqarnissaa.

- Takorluugaraarput, sivisuumillu pigisimavarput. Nuannernerpaassagaluarpormi timersornikkut pitsaassutsini annerpaat ilaannik internationaliusumik  Nuummi unammersuartitsisinnaagaluarutta. Tassanilu assammik arsartartorpassuit peqataassapput. Takorluugaraarput, sivisuumillu takorluugarisimallutigu. Angujuminaatsuunngilaq, piviusunngortinnissaalu sulissutigaarput, Nunanut allanut sungiusaasoq Niels Møller naggasiiivoq.