Nunanut allanut unammisartut Danmarkilialersut

Nunatta isikkamik arsarlutik nunanut allanut unammisartui klubbit pingasut unammiartorlugit Danmarkiliassapput.

Allattoq Mads Pedersen

juunip 09-at 2016 12:17

Sungiusaatigaluni unammisaqattaarnermi Nunatta isikkammik arsaattartuisa Vanløse IF, B-93 aamma Aarhus Fremad juunimi naapissavaat.

- Nunanut allanut unammisartugut pitsanngorsartuartariaqarput. Taamaammat Danmarkimut sungiusaatigaluta unammigiarnissamut periarfissinneqarnerput nuannaarutigaarput, nunanut allanut unammisartunut sungiusaasut Rene Olsen aamma Tekle Ghebrelul oqarput.

Aamma atuaruk Nunanut allanut unammisartut EM-imi peqataasalissasut

Kalaallit nunanut allanut unammisartuini peqataasut N-48 Ilulissanit, B-67 Nuummit, K-33 Qaqortumit, IT-79 Nuummit, G-44 Qeqertarsuarmit kiisalu B-93 Københavnimit peqataasoqarpoq.

John L. Brobergip, B-67-imi unammisartup, unammisassatik sukataarnassasut naatsorsuutigaa.

- Pikkorissuussasut naatsorsuutigaara. Qallunaat klubbiinut unammisarnitsinni qallunaat arsalerillaqqillutillu nukittuneri malugisarpara. Aamma unammisassagut pitsassuusut tusartarpara.

- Qallunaat ivikkani arsaanneq sungiusimavaat, taamaattorli akersuussinnaasarpugut ajugaasarlutalu, John L. Broberg nunanut allanut unammisartutut misilittagalik KNR-imut oqarpoq.

Taassuma unammiarnissani qilanaaraa.

- Nunanut allanut unammisanngikkutta siuariartornavianngilagut, John L. Broberg naggasiivoq.

Unamminerit Vanløse Idrætsparkimi juunip 19-iani, B.93-ip arsaattarfiani Østerbromi Københavnimi juunip 21-ani kiisalu Riisvangen Stadionimi Aarhusimi juunip 23-ani pissapput.

Nunanut allanut unammisartut tassaapput:

Måliniittut:

Gabriel Petersen N-48 Ilulissat

Brian Kleist K-33 Qaqortoq

Kinguarsimasut:

Mika Davidsen G-44

Miki Efraimsen NÛK

Niels Svane B-67 Nuuk

Lars Erik Reimer N-48 Ilulissat

Nukannguaq Zeeb G-44 Qeqertarsuaq

Qeqqaniittut:

Angula Kielsen K-33 Qaqortoq