Pituffik USA-mut nutaamik illersornissamut isumaqatigiissuteqartoqassanngilaq
Pituffimmi sullissinissamik isumaqatigiissuteqanngitsoorneq assortuussutaalermalli, partiit Nunatsinniittut tamarmik piumasarisimavaat Danmark Kalaallit Nunaallu USA’p sakkutuuisa Nunatsinniinnerata nutaamik isumaqatigiissusiorneqarnissaa.
Piumasaqaat tamanna Inuit Ataqatigiit sinnerlugit Folketingimi ilaasortap Aaja Chemnitz Larsenip Folketingimi isumasioqatigiinnermi uteqqippaa.
- Illersornissaq pillugu pissutsit tamakkiisumik qissimigaarneqaqqittariaqarput, nunat allat assersuutigalugu Nunatsinni sakkutooqarfeqarniarunik tamanna qanoq iliornikkut nunatsinnut iluaqutaanerusinnaanersoq paasiniassagatsigu, matumani kiffartuussinissamik isumaqatigiissut kisiat eqqarsaatiginagu, illersornissamulli tunngasut tamakkiisumik isigalugit, Aaja Chemnitz Larsen oqarpoq.
Ministeri: Ingerlanerlunneqaaq
Pituffimmillu kiffartuussinissamik isumaqatigiissut pillugu aaqqiagiinngissuteqartoqarsimanera Kristian Jensenip ajuusaarutigaa.
- Aaja, siullermik oqartariaqarpunga: Pituffik pillugu aaqqiagiinngissutit pinngitsoortinneqarsimanissaannut kissaat soorunami isumaqatigaara. Pisut pitsaavallaarsimanngillat, Nunanut allanut tunngasunut ministeri Kristian Jensen oqarpoq.
Pituffik pillugu pissutsit atuuttut taamaammat misissorniarpai.
- Illersornissaq pillugu pissutsit atuuttut tamakkiisumik misissorniarpavut, Pituffik matumani ilaalluni, akileraarutitigut isertitarineqarsinnaasut kisiisa eqqarsaatiginagit, pissutsilli allat aamma, assersuutigalugu sakkutooqarfeqarnerup Kalaallit Nunaannut sapinngisamik iluaqutaanerusinnaaneranut tunngasut, Kristian Jensen oqarpoq.
Taamaattoq taassuma erseqqissaatigaa Illersornissaq pillugu isumaqatigiissut nutaaq siunissami qaninnerusumi isumaqatigiinniutigineqarnavianngitsoq.
- Illersornissaq pillugu isumaqatigiissutip pioreersup allatut isumaqatigiinniutigineqarnissaanut siunissami qaninnerusumi periarfissaqarunanngilagut. Pissutsilli maanna isumaqatigiissutip iluanittut immaqa isumaqatigiinniutigeqqissinnaavagut, Kristian Jensen, Folketingip Kalaallit Nunaannut tunngasunut ataatsimiititaliaani isumasioqatigiittoqarnerani ilaatigut oqarpoq.
