NunaMinerals suli ingerlavoq
Pisortaasimasup Ole Christiansenip piumasaqarneratigut ingerlatseqatigiiffik akiliisinnaajunnaartutut Kalaallit Nunaata Eqqartuussivianit juulip aallaqqaataani nalunaarutigineqaraluarpoq.
Akiliisinnaajunnaarneq pillugu inatsit naapertorlugu ingerlatseqatigiiffimmut piginnittut eqqartuussiviup aalajangigaanut ullut 14-it iluanni suliareqqitassanngortitsisinnaapput. Suliareqqitassanngortitsisimasullu Nunamineralsip eqqartuussissuserisuata Britta Keldsenip Sermitsiamut uppernarsarpaa.
Taamaammat suliaq Nunatta Eqqartuussivianut ingerlateqqinneqarpoq, tassanilu peqqussutigineqareertoq allanngortinneqassanersoq nalilerneqassasoq, aviisi allappoq.
KNR-ip paasissutissaatai naapertorlugit, akiligissaqarfiit 55-it katillugit 40 millionit koruuninik Nunamineralsimit akiitsoqarfigineqarput.
