NunaMinerals naggammik periarfissinneqartoq
Ingerlatseqatigiiffimmik piginnittut tuluit Nunatta Eqqartuussisuuneqarfianit decembarip 20-ata tungaanut periarfissinneqarput taamanikkussamut akiligassaqarfiit 60 procentii qularunnaartissimassallugit suliffeqarfiup akiliisinnaajunnaarsinneranit ingerlateqqinnissaa pissarsiffiginerusinnaallugu. Atuagagdliutit taama allaaserisaqarput.
Ingerlatseqatigiiffiup akiliisinnaajunnaarnissaanik qulakkeerinnittussamik akiligassaqarfiit 40 procentii sinnerlugit septembarip qaammataani isumaqatigiissuteqarnissamut piareersimapput, tamannalu tunngavigalugu eqqartussivik isumaqarpoq akiliisinnaajunnaarnissaq pinngitsoortinniarlugu aaqqiissuteqarnissaq periarfissaasoq. Taamaammat akiliisinnaajunnaartoqarneranik suliaq unitsikkallarneqarpoq.
Iluatsissappallu ingerlatseqatigiiffik tulunnit pigineqarluni ingerlaqqissinnaassaaq, iluatsinngippallu akiliisinnaajunnaartoqarneranik suliaq nangeqqinneqassaaq.
Akiligassaqarfiit ilaat tassaapput Namminersorlutik Oqartussat ingerlatseqatigiiffimmit 4,5 millionit koruunik akiligassaqarfigineqartut. Akiliisinnaajunnaarnissarlu pinngitsoortinniarlugu aaqqiissutissarsisoqarsinnaassaappat Namminersorlutik Oqartussat aningaasat pissarsiassatik tigussavaat taamaattumillu isumaqatigiissuteqarnissaq Namminersorlutik Oqartussat tapersersoraat, naalakkersuisoqarfimmi pisortap Søren Haldip Atuagagdliutinut uppernarsarpaa.
