Nunaminerals isumalluarpoq
Nunaminerals Namminersorlutik Oqattussanit 4,5 millionit koruuninik decembarimi aningaasalerneqarallarpoq. Taamammallu ingerlatseqatigiiffik januaarip tungaanut ingerlatsinerminut akiliisinnaassuseqalerallarluni.
Nunamineralsip 2015-imi januaarip tungaanut ingerlasinnaanera qulakkeerneqarmat, ingerlatseqatigiiffiup Naalakkersuisunngortunut nutaanut ataavarnerusumik aningaasaliinissamik kissaateqarnermini oqaloqatiginninnissani aamma qulakkeerpaa.
AAMMA ATUARUK NunaMinerals februaarimi matoriaannaavoq
- Nunamineralsip akiliisinnaassusia piujuartinniarlugu aamma ingerlatseqatigiiffiup siunissaa pitsaasuutinniarlugu periarfissanik qulaajaanissaq, Naalakkersuisuulersut nutaat peqatigalugit pissasoq upperaarput, Nunamineralsimi siulittaasoq Birks Bovaird oqarpoq.
Nunamineralsip, marsimili aningaasaqarnikkut ajornartorsiortup, pisortaqarfiata aamma siulersuisui nunanit allaneersunik aningaasaliisartunit aningaasaleerusuttoqarnersoq paasiniarlugu misissuinertik ingerlappaat.
