Nunaatillit panernersuaqarneranit eqqugaasut
Kujataani qaammatini kingullerni marlunni qaqutigoortumik panernersuaqarnera pissutigalugu savaateqarfinni narsaatit asinngarsimaneri inerititaqarfiusimannginnerilu borgmesterip oqaluttuarai. Kujataani kingullermik juunip 20-iata nalaani iluamik siallerpoq, taamanermiillu sialoqanngilluinnarsimalluni.
- Taamanili kuserninnguamilluunniit sialleqqinngilaq, Wæver Johansen taama allappoq.
Aamma qaqqani naanerit asiulermata savat nerisassaqarluanngillat, taamaattumillu savaaqqat oqinnerullutik.
- Uagut nunatut ataatsimoorluta nunaatilittavut piaarnerpaamik ikiortariaqarpavut soorlu nunani allani taama iliortartut, borgmesteri allappoq, nunaatillillu amerlasuut tunniutiinnarsinnaanerat aarleqqutiginerarlugu.
AAMMA ATUARUK Nanortallip kujataani nuna ikuallattoq
Nerukkaatissanik assartueqqinnissamut akuereqquneqartut
Naalakkersuisut ilaatigut kajumissaarpai umiarsuarmik nerukkaatissanik pajuttussamik tikisitsisoqarnissaanut immikkut ittumik akuersissuteqaqqullugit, savaateqarfiit naammattunik nerukkaatissaqarnissaat qulakkeerumallugu.
Aammattaaq nunaatillit panernersuarmit eqqugaasut nerukkaatissarsiutissaminnik immikkut ittumik taarsigassarsitinneqarnissaat kajumissaarutigaa, kiisalu aamma savaateqarfiit tamarmik imerterutinik pitsaasunik pisaarnissaat kajumissaarutigalugu.
- Kisianni, piaarnerpaamik iliuuseqartoqartariaqalerpoq nunalu tamakkerlugu ataatsimoorluni iliuuseqartoqartariaqalerluni, Kommuni Kujallermi borgmesterip nuna tamakkerlugu politikerinut kajumissaarutini taama naggaserpaa.