Nuna tamakkerlugu aviisit saqqummersartut ersinngitsumik taperniarpaat
Aviisit nuna tamakkerlugu saqqummersartut Sermitsiaq aamma AG aningaasarpassuarnik annaasaqarput Namminersorlutik Oqartussat annoncit innersuussissutit kisiisa atorlugit annonciliissalermata. Taakkumi inikinnerullutillu akikinnerupput.
Maannali Naalakkersuisut peqataaffiginialerpaat annoncit innersuussissutaannaagaluartut annoncetut tamakkiisutut akilerneqartassasut. Tamanna 1 million koruuninik akeqassaaq taakkulu aningaasaqarnermut sulisoqarnermullu aqutsisoqarfimmut aningaasaliissutinit nuunneqassapput.
Tamanna aningaasaqarnermut ataatsimiititaliap aalajangernerini takuneqarsinnaavoq.
- Aviisinut nuna tamakkerlugu saqqummersartunut ersinngitsumik toqqaannanngitsumillu tapiissuteqartoqartarsinnaaneranik aammalu tamatuma ammasumik takuneqarsinnaasumillu pisalernissaata kissaatigineqarnera Naalakkeuisuisunit paasissutissiissutigineqarmat aningaasaqarnermut ataatsimiititaliamit tusaatissatut tiguneqarpoq, aningaasaqarnermut ataatsimiititaliaq allappoq.
2013-mulli atatillugu Naalakkersuisut taamatut aningaasaliissuteqarniarunik aningaasaqarnermut ataatsimiititaliamut akuersissummik aallertariaqassagunanngillat. Tassami 2013-mi aningaasanut inatsisissatut siunnersuummi allaqqavoq aviisit nuna tamakkerlugu saqqummersartut ataavartumik tapiiffigineqartalernissaat anguniarneqartoq.