- Kuannersuarmi taamalu Killavaat Alannguani aatsitassarsiorsinnaanerup peqqissutsimut pinngortitamullu akornusiinngippata aallartinneqarlutik aningaasarsiutaalertariaqartut, Siumut isumaqarpoq.

Taama Siumup anguniagaani Nuummi ukioq 2020-mi novembarip qaammataani allanneqartumi allaqqagaluarpoq, allaqqasorli taanna ullumikkut allanngortippaat. Nuna tamakkerlugumi atuutilissasoq kissaatigalugu ullumikkut nalunaaqutaq arferngup missaani isumaqatigiissutigaat. Tamanna eqimattakkuutaarlutik ulloq naallugu oqallittareernerisa kingorna pivoq. 

Qulequtaq eqimattami partiip aallartitaasa 15-t missaanniit peqataaffigineqartumi eqqartoqqaarpaat, taassuma kingorna Qasigiannguani katersortarfimmi qiimmatsaqqasunut katersuuttunut Qeqqata Kommuniani borgmesterimit, Malik Berthelsenimit (S) saqqummiunneqarpoq. Taannalu partiip anguniagaani matumani allannguinertik pillugu KNR-imut ima tunngavilersuivoq:

- Kuannersuarni aatsitassarsiortoqannginnissaanik siunertaasoq tassaanerpaasoq Narsamut qanippallaarnera qularutigineqarsinnaagunanngilaq, taava nunatsinni sumiiffinni assersuutigiinnarlugu najugaqarfigineqartumut ungasissumi nassaartoqaraluarpat, taava sooq sumiiffik ataaseq aallaavigiinnarlugu nunarput tamaat ataatsimut mattunneqassava, Malik Berthelsen (S) taama tunngavilersuivoq.

Uran isumaqatigiinngissutaasoq

Uranimut tunngatillugu apeqqut inuiaqatigiinni ukiorpassuarni eqqartorneqartuarpoq. Uranimik piiaanissamut akuersaartuullutik, Siumup partiip anguniagaani ukiuni arlaqartuni allaqqagaluartoq, Inuit Ataqatigiit (IA) politikkikkut pissaaneqaqatigalugit naalakkersuisoqatigissagunigit tamanna tunuarsimaarfigisariaqarsimavaat.

Oqallinnerlu tamaanga killissasoq isumaliornarsissagunaraluarpoq. Tamaangali killinngilaq. Naalakkersuisummi Siumut aamma Inuit Ataqatigiit suleqatigiinnissamut isumaqatigiissutaani ima ersaritsigisumik isumaqatigiissuteqarput:

- Naalakkersuisut isumaqatigiippugut nunatsinni uranisiortoqassanngitsoq.

Partiip aallartitaasa partiip anguniagassaanik ullumi arfininngornermi allannguinerat aqagu ulloq pissanganartuunissaanik ilimasaarivoq.Siulittaasussaminnimmi nalunaaqutaq marlunut taasissapput. KNR-miit Qasigiannguit katersortarfiani taasinermi taasinerit kingulliit kisinneqarnissaasa tungaanut qanimut malinnaassaagut.