Nuna ikuallattoq: Piumassutsiminnik ikiuuttut uutitertut
Tupeq, nammineq piumassutsimik ikiuuttut sisamat siniffigisaat, Kangerluarsuk Tullermi arfininngornermi ullaaralaakkut nungulluni ikuallappoq. Tupermi sinittarput Kangerluarsuk Tullermi nunami qaammat sinnerlugu ikuallattumi qamisaaqataallutik nammineq piumassutsimik ikiuuttut.
AAMMA ATUARUK Qatserisartut nuna ikuallattoq qamilluinnalerlugu nuannaarutigigaat
Nuna maannakkut ikuallakkunnaareerpoq.
Nammineq piumassutsiminnik ikiuuttut sisamat sininneranni tupeq siniffigisaat ikuallalerpoq. Taakkuani marluk igaffimmi ikiuuttuupput, marlullu umiatsiaminnik angallassillutik ikiuuttuullutik. Uutitertullu tassaapput arnaq igaffimmi ikiuuttoq kiisalu angut angallamminik qatserisartunik nerisassanillu Sisimiunut Sisimiuniillu Kangerluarsuk Tullermut assartuisartoq.
Aniffissakkut ikuallattukkut pissittoq
Tupermik ikuallattoornermi uutitertut tamarmik talimikkut uutiterput. Uutitertut aappaat tassaavoq Aputsiaq Olsen Jonathansen.
- Ullaakkut arfineq marlunut tanneq qulinngortoq iterpunga nilliaffigineqartugut aneqqulluta, Aputsiaq Olsen Jonathansen oqaluttuarpoq, nangillunilu:
- Allequtaq illersuutiginiarlugu tiguara, kisianni aniffissara aamma ikuallalerpoq, tassanngaanniillu ikumasoq aqqutalugalugu silammut anivunga, taamaalillunga talikkut illuttut uutiterlunga.
Aputsiaq Olsenip ilanngullugu oqaluttuaraa Nuummut napparsimavissuarmut ingerlateqqinneqartussaalluni paasisimallugu, uutiternerisa passuteqqinneqarnissaat pillugu tassani nalilersuisoqassammat.
Upalungaarsimasut pisortaat: Politiit ajutoorneq misissussavaat
Tupip ikuallannerani aamma uutitertup aappaa KNR-imit attavigineqarpoq, aammalu taanna talimigut uutitersimavoq.
Tupip ikuallannerani ajoqusertut Kangerluarsuk Tullermit Sisimiunut, 1 tiimi ataallugu ingerlaarfiusartumi, angallammik arfininngornermi ullaakkut aallarunneqarput.
Nammineq piumassutsimik ikiuuttut sisamat tupiat arfininngornermi ikuallammat, tupermi unnuisut atisatik atortutillu, soorlu oqarasuaatit angallattakkat, tamaasa annaavaat.
Qeqqata Kommuniani upalungaarsimasut pisortaat, Ole Kreutzmann, Kangerluarsuk Tullermi ajutoorneq pillugu sapaammi oqaaseqarsinnaanngikkallarpoq ajutoorneq politiinut misissugassanngorlugu tunniunneqartussaammat.
