Nukappiaqqat immikkoortortami akuerisaanngitsumi najugaqarsimapput
Nukappiaqqanut 18-ileereersimasunut nammineersinnaanissamut sungiusarfissamik immikkoortortaqarfeqalerniarluni, ulloq unnuarlu angerlarsimaffik Tûgdlik 2010-mi januaarimi qinnuteqaateqarpoq.
Taassumalu adressia tassaagunarluni Tom Lyngemit, Tûgdlik Aps-imik piginnittuusumit najugaqarfigineqartoq. Illu pineqartoq 144 kvadratmeteriuvoq, allaaserineqarneralu najoqqutaralugu "inuulluataarnissamut immikkoortortaqarluni", aalartitsiviutigaluni timimik qasukkartitsisarfilimmik.
Najugaqartut sisamat inini ataasiuttarissani najugaqarsimapput. Nukappissat taakku tassaallutik Tûgdliup immikkoortortaani allaniissallutik inersimavallaalersimasut, taamaattorli inuiaqatigiinni nammineersinnaanissamut suli piareersimanngitsut.
Allaaserineqarnera pitsaagaluaqaaq, immikoortortaqarfilli akuersissuteqarani. Ukiup tulliuttup ingerlanerani angerlarsimaffiup oqartussallu akornanni allaffigeqatigeeqattaattoqarpoq.
Angerlarsimaffimmit oqaatigineqarpoq, immikkoortortaqarfik perorsaanermik ilinniagaqarsimasumik pisortaqassasoq, marlunnik ikiorteqarluni ataatsimillu pigaartoqassalluni. Immikkoortortami perorsaanermi iliuuseriniakkat allaaserineqarnissaat uppernarsaateqarnissaallu oqartussanit piumasarineqarpoq, allallutillu apeqqutit akissutissarsineqanngitsut arlaqarnerarlugit. Angerlarsimaffiup utaqqikatalluni, naak suli akuersissuteqartoqanngikkaluartoq, nammineersinnaasunngortitsiniarnermut immikkoortortaq 2011-p aallartinnerani aallartippaa.
Taamaattumik Naalakkersuisoqarfik februaarimi nakkutilliinerminut atatillugu takuniaareerluni, nukappissat immikkoortortamut inissinneqarsimasut, angerlarteqqullugit, kommuninut nukappissat angerlarsimaffigisaannut saaffiginnipput.
Tassami takuniaanermi paasineqarmat, "nukappissat sisamat sulisullu ineeqqani pingasuinnarni najugaqartinneqartut". Nukappiarlu ataaseq uffarfimmi najugaqartinneqarluni. Aamma angerlarsimaffiup oqaatigisaatut sulisut amerlassuseqanngillat. Soorlu aamma illu pineqartoq, kommunip ulloq unnuarlu angerlarsimaffissatut akuersissuteqarfigisimanngikkaa. Oqartussat takuniaallutik pulaarneranni sulisunit najuuttutuaq tassaavoq arnaq meeraaraatiminik nassarluni sulisoq. Taanna sulisut inaannik taaneqartumi najugaqarpoq, tassaasumik inip ilaa.
Ulloq unnuarlu angerlarsimaffimmit isumaqarput, akuersissummik peqarlutik, oqartussalli tamanna ilisarisinnaanngilaat. Immikkoortortaq Naalakkersuisunit akuerineqarsimanngitsoq, Naalakkersuisoqarfiup pappiaraataani takuneqarsinnaavoq. Taamaattumik ingerlaannartumik matuneqarnissaa aalajangiunneqarluni. Nuakappissat sisamat tassaniikkaluartut sumut inissinneqarsimanersut paasisaqarfigisinnaasimanngilarput.
