Assi: Jonna Larsen

Nukannguup Nuugaatsiami tassaarsuaq imaaniit isiginnaarpaa

Uummannap kangerluani arfininngormat pisoqarnerani nunaqarfik Nuugaatsiaq eqqugaavoq. Nuugaatsiarmiullu misigisani oqaluttuaraa.

Arfininngorneruvoq. Aalisartoq Nuugaatsiameersoq, Nukannguaq Samuelsen, meeqqaminit sisamaasunit ataaseq ilagalugu unnukkut nalunaaqutaq qulinut qiteqquttoq ningittagarsoreerlutik angerlamut nunaqarfimmut apuutilerlutik nulia sianerpoq:

- Oqarfigaanga tassaalerpoq, baalia amuarfik avalappoq. Taamaalimmat ajoqaaq. Immaqa minutsit marluk qaangiummata sianeqqippoq oqarlunilu immap illorput angusaaleraa illorpullu portuniusannguamiilluni. Assut tupappunga, qiviarlunga takuara malunnartumik mallilersimasoq.

Nukannguaq Samuelsenip nuliani meeqqanilu qatsinnermut qimaaqquai, takusanilu tupaallaatigeqai.

- Qimaarpalupput. Isigilerpagut illut avalagartut, tamannalu aqquterput ajorami mallernermullu tunumukarfissaannginnami. Qeqertannguit kujataatungaaniippugut oqquatungitsinni. Naamik, ajorami, misigisagut assorujuk ajorput.  

AAMMA ATUARUK Aqqartartut innap sisooqqissinnaanera pissutigalugu ujaasinaveertut

Ilaqutai nunaqqataalu qatsinnermut ingerlaannaq qimaasimapput. Imaannarmili nikeriarsinnaanani pisunut isigiinnartariaqarsimavoq.

Arsaaffigisartagaat narsaannarmiittoq morsulereersimavoq. Illualli qutsinnermiikkami ajoquserneqanngilaq.

- Illorput portunersannguaniikkami annaanngilarput. Kisianni illut katagarput, kisikkakkit illut immaqa arfineq marluk immamiipput. Ilai immamut nakkaangajallutik, ilai ungasissumut illuakaallutik ilaallu timmut. 

Nukannguaq erninilu nunamut niugamik qatsissumukarput. Politiit qatserisartullu pisut aallartinneriniit akunnerit marluk missaat qaangiuttut tikipput.

- Uagut nalunaaquttap akunnera ataatsip missaani tappikaneereerluta timmisartut ikiuiartortut marluk takkupput.

AAMMA ATUARUK Tassaarsuarneranit eqqugaasut taperserneqarluartut

Nuugaatsiarmiut Uummannami elevhjemmimi maanna katersuussimalerput.

- Nukittoqutigisorujussuuarput ataatsimoornerput. Ikiorneqarnerput assorujussuaq iluarpoq qujamasoqaagullu, Nukannguaq Samuelsen oqarpoq.

Nuugaatsiarmiunulli ulloq arfininngorneq juunip 17-at annaasaqarfioqaaq.

- Naammagittarniarsarivugut tunniusimallutalu. Aamma ullut siumut pisussat nalunarsinermut annaasagullu arlaqarnermut, soorlu qamuteralaat, umiatsiat, qimmit, aallaasit atorsinnaasullu tamarmik. Ullut siumut oqaatiginissaat suli nalunartorujuuvoq. Sussalluta qanorlu iliorneqassalluta nalugatsigu taama inissisimavugut, aalisartoq Nuugaatsiameersoq Nukannguaq Samuelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!