Norgep naalagaaffia uuliasiornermut tunngatillugu eqqartuussivimmut suliassanngortinneqartoq

Norgep naalagaaffia inatsisinik tunngaviusunik unioqqutitsisimasutut Greenpeacemit avatangiisinillu illersuiniaqatigiiffimmit allamit eqqartuussivimmut suliassanngortinneqarpoq.

Norgep naalagaaffiata eqqartuussivimmut suliassanngortinneqarnera eqqartuussisumit Hugo Abelsbethimit marlunngormat ullaakkut nalunaaqutaq qulingiluanut aallartinneqarmat, Oslop illoqarfiata eqqartuussiviani Ini eqqartuussivik 250 tusarniaarianik ulikkaarpoq.

Inatsisinik tunngaviusunik Naalagaaffiillu Peqatigiit silap pissusia pillugu 2015-imi isumaqatigiissutaannik unioqqutitsisoqarneranik suliniaqatigiiffiit marluk suliassanngortitsisuupput.

Avatangiisinik illersuiniaqatigiiffiit Greenpeace aamma Natur & Ungdom norgemiut avatangiisit pillugit politikkiat isornartorsiorpaat.

Taakku isumaqarput Norgep naalagaaffia Barentshavetimi imartani sunnertiasuni uuliasiorfissanik akuersissuteqarnermigut inatsisini tunngaviusuni paragraf 112-imik, avatangiisit illersorneqarnissaannut tunngasumik unioqqutitsisoq.

- Allanngortinneqarsinnaanngitsumik kinguneqartussamut akuersissuteqarnermi tunaartarisassat malinneqarsimanerannik misissuisoqarnissaa eqqartuussivimmut noqqaassutigaarput, avatangiisinik illersuiniaqatigiiffiit marluusut eqqartuussissuserisuat Oslop illoqarfiata eqqartuussiviani taama oqarpoq.

Greenpeace naapertorlugu Norgemi naalakkersuisut Barentshavetip kujataata kangiani uuliasiorluni qillerinissamut 2016-imi maajip qaammataani akuersissuteqarput.

Norgep nunani suliffissuaqarfiusuni siullersaalluni Naalagaaffiit Peqatigiit silap pissusia pillugu Parisimi isumaqatigiissutaannik atortussanngortitsineranit ullut qulit qaangiutiinnartut taama pisoqarpoq.

Naalagaaffik inatsisini tunngaviusuni paragraf 112-imik unioqqutitsinerarlugu eqqartuussivimmut suliassanngortippaat. Avatangiisit peqqinnartuunissaannik kikkulluunniit pisinnaatitaaffeqarnerat paragrafimi tassani ilaatigut naqissuserneqarpoq.

Greenpeace naapertorlugu uuliasiorluni gassisiorlunilu qillerinerit pillugit aalajangiisoqarnera Parisimi isumaqatigiissummut tunngatillugu eqqartuussisutigut siullerpaamik suliassanngortitsisoqarpoq. Tamatuma saniatigut aamma Norgemi paragrafi 112 eqqartuussisutigut siullerpaamik misilinneqartussanngorpoq.

Naalakkersuisut eqqartuussissuserisuata Frederik Sejerstedip unnerluussutaasut tamaasa tupaallannanngitsumik ilumuunnginnerarpai.

- Aalajangiinerit avatangiisinut kingunerlutsitsisinnaasut inatsisini tunngaviusuni inerteqqutigineqanngillat, naalagaaffilli pisussaatitaavoq ajoqutaasinnaasut millisarnissaannut suliniuteqassalluni, naalagaaffillu taamaaliorpoq, Sejersted taama tunngavilersuivoq.

Eqqartuussineq nunarsuarmit tamarmit soqutigineqarluarluni malittarineqarpoq.

/ritzau/NTB

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!