Norgemiut ministeriunerat ingerlaqqittussatut isikkoqartoq

Partiip Høyrep siulittaasua, maannamullu statsministeri Erna Solberg, qinersinerup kingorna kisitsinerit naammassiartuaarneranni unnuaq taama oqarpoq.

Taasinerit 90 procentii sinnilaarlugit kisinneqareersullu paasinarsivoq partiit talerperliit 89-inik ilaasortaatitaqalissasut, partiillu saamerliit qiterpasissumiittullu 80-inik ilaasortaatitaqalissasut. Norgemi inatsisartut katillutik 169-iupput.

Qinersinermi inernerit kingulliit marlunngornerup ingerlanerani saqqummiunneqarnissaat naatsorsuutigineqarpoq.

Norgemi statsministeritut qinigaaqqinnermini Erna Solberg partiip Høyrep oqaluttuarisaanerani pingaarutilittut inissisimalerpoq, naalakkersuisoqatigiilernissamulli pillugit partiit talerperliit isumaqatiginninniarfiginissaat ajornakusuussagunarput.

Solbergimi Norgep inatsisartuini Stortingimi amerlanerussuteqassaguni partiimit Venstremit Kristeligt Folkepartiimiillu tapersersorneqarnissani pisariaqartippaa.

Partiilli Høyrep Fremskrittspartimik suleqateqarnera partiit Venstrep Kristeligt Folkepartiillu iluarinngilaat.

Statsministerip partiit pingasut taakku isumaqatiginninniarnissanut aggersarniarpai, qanoq ililluni suleqatigiittoqarsinnaanera oqaluuserineqassalluni.

Tassa partiit naalakkersuisuutitaqartut Høyre Fremskrittspartiilu, partiillu talerperlerneersut tapersersuisut Kristeligt Folkeparti Venstrelu.

Norgemi inatsisartunut ippassaq ataasinngornermi qinersisoqarnerani arnat aatsaat amerlatigisut qinigaapput.

Arnammi qinigaasut, Stortingimi qinigaasut akornanni siullerpaamik 40 procentit maanna sinnerpaat. Qinigaasut katillutik 169-iusut akornanni arnat 70-iupput.

Arnat Norgep inatsisartuinut qinigaasut taamaasillutik 41,4 procentiupput.

Norgemi qinersisoqarnerani inernerit kingulliit ullumi ullup ilaani saqqummiunneqarnissaat naatsorsuutigineqarpoq.

/Ritzau/NTB/

/ritzau/NTB