Norgemiut Danmark qaangerlugu silarsuarmi pilluarnerpaanngortut

Norgemiut atugarissaarnermik, isumaginninnermik, naligiissitaanermik oqartussanullu tatiginninnermik silarsuarmi oqimaaqatigiissitsillaqqinnersaapput.
Assi © : Thomas Cuelho/Flickr Creative Commons
Allattoq Ritzau
marsip 20-at 2017 07:48
Nutserisoq Simon Uldum -

Silarsuarmi nunat pilluarfiunerpaat allattorsimaffianni Danmark siuttuujunnaarluni Norge siuttunngorpoq.

Silarsuarmi inuiaat pilluarnerpaat nalunaarusiami 'Silarsuarmi Pilluarneq pillugu nalunaarusiaq 2017'-imi, Sustainable Development Solutions Networkimit (SDSN) saqqummersinneqartumi toqqarneqarput.

Danmark arlaleriarluni siuttuusarsimavoq - soorlu siorna aamma taamaattoq.

Nunarsuaq tamakkerlugu suliniutaasoq Naalagaaffiit Peqatigiinnit 2012-imi saqqummiunneqaqqaarpoq naligiissitaanerullu tatiginninnerullu sammineqarnerunissaannik siunertaqarluni.

Nunat avannarliit nalinginnaasumik pilluarfiunerpaaffiupput.

Allattorsimaffiup naqqaniipput naalagaaffiit Afrikamiittut eqqissiviilliorfiusullu Syria Yemenilu.

- Nunat pilluarfiusut tassaapput atugarissaanermik, isumaginninnermik, inuiaqatigiinnut tatiginnilluarnermik oqimaaqatigiissitsillaqqiffiusut naligiinngiffiuvallaanngitsut pisortanullu tatiginnilluartut, SDSN-imiu pisortaq Jeffrey Sachs taama oqarpoq.

Norgep kingorna inissisimasut tassaapput Danmark, Island, Schweiz, Finland, Holland, Canada, New Zealand, Australia Sverigelu.

Allattorsimaffiullu naqqaniipput Sydsudan, Liberia, Guinea, Togo, Rwanda, Tanzania, Burundi aamma Den Centralafrikanske Republik.

USA normu 14-itut inissisimavoq Tysklandilu normu 16-iulluni. Tuluit Nunaat normu 19-iuvoq Frankrigilu normu 31-ulluni.

Allattorsimaffimmi tunngavigineqartut aalajangersimasut arfiniliupput: innuttaasumut ataatsimut bnp-ip angissusia, napparsimanani qanoq sivisutigisumik inuusoqartarnerata naatsorsuutigineqarnera, qanoq kiffaanngissuseqartigineq, isumaginninnikkut isumassorneqarneq, qanoq tunisiumatutigineq kiisalu naalagaaffimmi inuussutissarsiortullu akornanni qanoq peqquserluttuliortoqartanngitsiginera.

Allattorsimaffiup naqqaniittut tunngavigineqartuni arfinilinni tamani angusarissaarpallaanngillat.

/ritzau/Reuters