Ernumassutit rektorimit pissutissaqarsorineqanngitsut
Naalakkersuisut ilinniarfeqarfinnik sisamanik illoqarfinnut allannut nuussuisinnaaneq misissoraat, KNR-ip siusinnerusukkut oqaluttuarereerpaa.
Isumaginninnermi siunersortinngorniat ilinniarfiat, Nuummi Ilisimatusarfimmiittoq, Ilulissanut nuunneqarsinnaasoq, taakkununnga ilaavoq.
Taanna nuunneqassappat ilisimasanik misilittakkanillu annaasaqarnissamik kinguneqassasoq, Ilisimatusarfimmiit ernumassutigineqarpoq.
Ernumanissarli pissutissaqanngitsoq, Perorsaanermik Ilinniarfimmi rektori isumaqarpoq.
AAMMA ATUARUK Uddannelser kan rykke fra Nuuk
Isumaginninnermi siunnersortitut ilinniarfik Ilulissanut Perorsaanermik Ilinniarfimmut, SPS-imut, nuunneqarsinnaavoq. Taamali isumaliuteqarneq Ilisimatusarfimmi isumaginninnermut tunngasunut immikkoortortaqarfimmit isornartorsiorneqarpoq. Isumaginninnermi siunnersortitut ilinniarfik Ilulissanut nuunneqassappat sulisut ilisimasaannik misilittagaannillu annaasaqarnissaq adjunktip Steven Arnfjordip ernumassutigaa.
AAMMA ATUARUK Udflytning af uddannelser må ikke gå udover kvaliteten
- Sulisussarsiornerit allat ulluinnarni ingerlattareerpagut, sulisussarsiornerillu ingerlassapput, Nuka Kleemann oqarpoq, nangillunilu:
- Soorunami annaasaqaataassaaq, kisianni imaanngilaq ilinniarfik arlaatigut inerisaqqissinnaanngitsoq.
Isumaginninninermulli siunnersortit Ilisimatusarfimmi, qaffasissumik ilinniagaqartunik qaffasissumillu ilinniartunik avatangiiseqarlutik, ilinniarunik iluaqutigisorujussuugaat, Steven Arnfjord oqarpoq.
AAMMA ATUARUK Nuussuineq akisunerusinnaasoq
Ilinniarfiullu Ilisimatusarfimmiinnera iluaqutissartaqartoq, SPS-imi rektorip oqaatigaa, Ilulissalli aamma neqerooruteqarluarsinnaasoq, erseqqissaassutigalugu.
Ilinniartut Nuummeersut ilinniartunik pimoorussisunit tikilluaqquneqassasut, illuutinilu nutaaliani ilinniarsinnaasut, rektorip assersuutigai.
Inunnik isumaginninnermik Ilinniartut Ilulissaniilernissaannut SPS suleqateqarnissamut aaqqiissuteqarnissamullu piareersimasoq, SPS-imi rektori, Nuka Kleemann oqarpoq.
