AVALAK: Nivi Olsenip ilinniartut atugaat ilisimanngilai

Ilinniarnersiutinut, SU-mut, malittarisassat allanngornerannut tunngatillugu oqallinnermi kalaallit Danmarkimi ilinniartut ilinniartitaanermut naalakkersuisumit arajutsineqarsoralutillu paatsoorneqarsoripput.
Assi © : Avalak
oktobarip 24-at 2016 16:25
Nutserisoq Connie Fontain

Avalammi siulittaasup Pam Stachip ilinniartitaanermut naalakkersuisup Nivi Olsenip SU-p allanngorneqarnissaannik pilersaarutit pillugit oqaasii tupaallaatigai.

- Ilumut ulluinnarni ajornartorsiutigut nassuerutigerusunngikkai misigisimavunga, KNR-imut oqarpoq.

Aamma atuaruk Kalaallit ilinniagaqartut Danmarkimi SU pillugu malittarisassat malittariaqarpaat

Ilinniarnersiutit allanngortinneqassappata kalaallinut Danmarkimi ilinniagaqartunut immikkut malittarisassaliortoqaqqullugu Nivi Olsenip danskit naalakkersuisuinut piumasaqaateqarumannginnera Avalammi siulersuisut paasisinnaanngilaat.

Taamaaliornermi kalaallit danmarkimi ilinniagaqartut “pilliutaasutut” inissinneqartissagaat Nivi Olsen isumaqarpoq.

AVALAK: Annerusunik unammilligassaqarpugut

Qaammammut ilinniarnermusiat ilaat ilinniarnermi taarsigassarsianut ilanngunnissaat danskit naalakkersuisuisa 2025-imut pilersaarutaannut ilaassasoq, Vestrep kissaatigaa.

AVALAK-miillu isumaqarput, aningaasat tigusartagassat - tassa ilinniarnermusiat taarsigassarsiallu - ataatsimoortikkaanni ullumikkornit amerlaneruleraluarpaluunniit kalaallit danmarkimi ilinniartut danskinit ilinniartunit eqqugaanerungaatsiassasut.

Danmarkimi akit Nunatsinniit appasinnerugaluartut assersuutigalugu kollegiani ineqarneq akisunerujussuuvoq. Danskilli ilinniartut atugarissaarnerusut Avalammi siulittaasoq isumaqarpoq.

- Ilinniartorpassuit danskiusut angerlarsimaffimminniit (aningaasatigut) tapersersorneqarput. Ilinniartorpassuillu (nunatsinneersut) ilaquttaminni siulliullutik ilinniagartuunngorniartuupput, taamaammat angerlarsimaffimmiit aningaasatigut taperserneqarsinnaaneq assigiinngilaq, Pam Stach oqarpoq.

Ilinniartut atugaat misissoqquaat

SU-mut malittarisassat nutaat kalaallinut, savalimmiormiunut danskinullu atuuttussaagaluartulluunniit ungasissuseq Naalakkersuisut eqqarsaatigisariaqaraat Avalammi isumaqarput.

- Danmarkiliaraangatta ilaquttagut, ikinngutigut allatulli attaveqarfissagut, ikorfartortissagut tapersersortissagullu qimattarpagut(..). Taava aamma  apeqqutigerusuppara: Ilaquttat ukiumut ataasiaannaq takusarneri nukatsitaaneruva? Uanga taamaassorinngilara.

Nivi Olsenip oqarnera “Allaat aningaasat attartugaat soorlu qarasaasianut, iPhonenut angalanernullu atorsimasaat akilertarpavut.” Pam Stachip annermik mamiatsaatigaa.

SU-P QAFFASISSUSAA

Ilinniarnermi aningaasat ikiorsiissutit: Danmarkimi ilinniarfinni ingerlariaqqiffiusuni ilinniartut ullumikkut akileraannginnermi aningaasat 5.941 kr. akileraareerlutik 5.100kr.pisarpaat.

Danskit Naalakkersuisuisa siunnersuutaat malillugu imaalissapput akileraannginnermi 4.573 kr. akileraareerluni 4.300 kr.

 

Ilinniarnermi taarsigassarsiat: Ilinniarnermi taarsigassarsisoqarsinnaavoq akileraannginnermi 3.040 kr. akileraareerluni 3.000 kr.

Danskit Naalakkersuisuisa siunnersuutaat malillugu ilinniarnermi taarsigassat imaalissapput, akileraannginnermi 4.344 kr. akileraareerluni 4.300 kr.

 

Katillugit: (illinniarnermi aningaasat ikiorsiissutit taarsigassarsiallu ataatsimoortillugit) ullumikkut akileraareerluni 8.100 koruuniupput, danskillu naalakkersuisuisa siunnersuutaanni akileraareerlunilu 8.600 koruuniussallutik.

 

Tusarfik: Ilinniartitaanermut ilisimatuutullu misissuinermut ministereqarfik

- Taama isumaqarneq aningaasartuutitsinnut aningaasaqarniarnitsinnillu paasinnissimannginnermik takutitsivoq, ilinniartuusugullu sunik tamanik tuniorarneqartutut aningaasatigullu piisaartutut taagorluta, uffa ilinniartorpassuit aningaasassaqarniarlutik saniatigut suliffeqartariaqartut, ilinniarnermik unitsitsiinnarnissap qaninnerulerneranik kinguneqartumik, Pam Stach oqarpoq.

Ilinniartitaanermut Naalakkersuisoqarfik Kalaallit Illuutai peqatigalugit Kalaallit Danmarkimi ilinniartut atugarissaarneranut misissuissasoq Avalak maanna kissaateqarpoq.

Tamannalu Nivi Olsenip akuliuttariaqarneranut takussutisseeqataassaaq.

- Kisitsisinik paasissutissanillu pissarsiniassagatta taavalu aamma naalakkersuisup uaugut pilluta isumaa isummiussaalu ilumut tunngavissaqarnersut paasiniassagatsigu.