Nivi Olsen: Kikkulluunniit meeqqanik sullissisut innarliisimannginnissaat piumasaraarput

Meeqqanik pinerliisimannginnissamut uppernarsaat pinerlussimannginnermut uppernarsaammut assiguvoq, taamaattoq tassani pineqarluni, meeqqanik 15-nit inorlugit ukiulinnik kinguaassiutitigut kannguttaattuliorsimannginnermik atsiornikkut uppernarsaanissaq.

Meeqqanik pinerliisimannginnissamut uppernarsaatinik atsiortussat siornatigut tassaanerusarput perorsaasut, ilinniartitsisut aamma klubbini sullissisut.

Inatsisilli allanngortinneqarnerani inuit meeqqanik 15-nit ataallugit ukiulinnik sullissisut tamarmik pinerliisimannginnermut uppernarsaammik piumaffigineqartalersussaassapput soorlu meeqqerivinni asaasut, igafimmi sulisut aamma katersugaasivinni sulisut.

Inatsisip tamassuma allanngortinneqarnissaanut saqqummiisuuvoq, ilinniartitaanermut, kultureqarnermut, ilisimatusarnermut aamma ilageeqarnermut naalakkersuisoq, Nivi Olsen, taannaalu ima siullermik oqarpoq.

- Toqqaannanngikkaluamik sullissiniaraanni, soorlu meeqqerivinni igasut, asaasut allallu tassani sulisut pillugit, sulisitsisoq pisinnaatitaaffeqarlerpoq sulisut meeqqanik pinerliisimannginnissamut uppernarsaammik atsiortitsisinneqarnissaannut, Nivi Olsen oqarpoq.

Tamakkuinnaanngillalli. Aamma meeqqat 15-nit sinnerlugit ukiullit piumaffigineqartalersussaassapput, taakku ilaqutariinni meeqqanik atugarlioreersunik paaqqutaqartalernissamut akuersissummik pigisaqalernermut atatillugu.

- Naalakkersuisunit pingaatinnerpaavarput, meeqqap ilaqutariinnut inissinneqartup pitsaanerpaamik pineqarnissaa. Taamaattumik oqartoqarsinnaavoq angerlarsimaffinni ilaqutariinnut ilaasut meeqqat imaluunniit meeqqat paaqutarineqalersussat sorliit pingaartinneqarnerpaassanersut. Naalakkersullu aalajangerpaat meeraq paaqqutarineqartussaq soorunami pingaartinneqarnerpaassasoq.

Ilinniartitaanermut, kultureqarnermut, ilisimatusarnermut aamma ilageeqarnermut naalakkersuisoq, Nivi Olsen oqarpoq.

Meeqqanik pinerliisimannginnissamut uppernarsaammik atsiornissaq aatsaat pisassaaq pineqartup tamanna allakkatigut akuersissutigippagu.

Inatsisip tamassuma allanngortinneqarnissaanut saqqummiisuuvoq, ilinniartitaanermut, kultureqarnermut, ilisimatusarnermut aamma ilageeqarnermut naalakkersuisoq, Nivi Olsen.