Nivi Olsen: Ilisimasat pissarsiarisinnaasagut tamaasa atorfissaqartippagut

Ilisimatusarfimmi kandidatit ph.d-milu ilinniartut allaffissorneq, inuussutissarsiutit inuiaqatigiillu pillugit ilisimalikkaminnik ingerlatitseqqiisarnissaminnik siunissami pitsaanerusumik periarfissaqalernissaat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup qulakkeerniarpaa.
januaarip 22-at 2015 07:05
Nutserisoq Simon Uldum -

Inuiaqatigiit ilinniartitaanermut aningaasarpassuit atortarpaat. Taamaammat ilinniartut soraarummeerutiminnik allaaserisaqarnerminnut ph.d-nngornermilu ilisimatuutut allaaserisaqarnerminnut atatillugu ilisimalikkaminnik ingerlatitseqqiisarnissaat pingaaruteqarpoq, Nivi Olsen isumaqarpoq.

- Ilisimatusarfimmi ilinniartut ilisimasaasa pingaaruteqartut ingerlateqqinneqartannginnerat uggorisaqaara. Qularutiginngilara ilinniartut aamma taamatut misigisimasassasut. Suliaqarluarsimagaanni soorunami allanut ingerlateqqikkusunnartarput. Ilinniartut soraarummeerutiminnik allaaserisaqarnermi ph.d-inngornermilu ilisimatuutut allaaserisaqarnermi ilisimaligaat ajoraluartumik ullumikkut taamaallaat soraarummeernermut atorneqartarput, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen, Ilisimatusarfimmi kandidatitut siorna soraarummeertoq taama nassuiaavoq.  
 
- Ilinniartut tamarmik suliassaqarfinnut atasunik soraarummeerutiminnik allaaserisaqartut ph.d-miluunniit ilisimatuutut allaaserisaqartut ilisimassavaat ilisimasaminnik paasisaminnillu uannut atorfilittannullu saqqummiusserusussappata nuannaarutigingaassaginga, taamaalilluta ilisimasaat sulinitsinni atorsinnaaniassagatsigit.  Isumaqarpunga taamatut aaqqissuussineq kikkut tamat iluaqutigissagaat. Ilinniartut ilisimasaminnik ingerlatitseqqiissapput, naalakkersuisoqarfillu paasissutissanik pingaaruteqartunik pissarsissalluni, Nivi Olsen tusagassiorfinnut nalunaaruteqarluni taama allappoq.