Nivi KNR pillugu: Akuliuffigineqassanngilaq

KNR-ip kiffartuussinissamik isumaqatigiissutini naammassisussaavaa, KNR-illi imarisaa politikerinit akuliuffigineqassanngilaq, tamanna Naalakkersuisunit erseqqissaassutigineqarpoq.
Naalakkersuisoq for uddannelse Nivi Olsen
Assi © : KNR
decembarip 07-at 2015 09:47
Nutserisoq Simon Uldum -

Suliffeqarfiup innuttaasunik kiffartuussiviup KNR-ip ulluinnarni ingerlanneqarnera Naalakkersuisut akuliuffigisinnaanngilaat.

Siumumeersup Ineqi Kielsenip apeqquteqaataanut akissuteqarluni Kultureqarnermut naalakkersuisoq Nivi Olsen tamanna naqissuserpaa.

KNR-imi ulluinnarni suliarineqartartut Naalakkersuisunit akuliuffigineqarsinnaanersut Siumut sinnerlugu Inatsisartuni ilaasortap Ineqi Kielsenip paaserusussimavaa.
 
 

Akuliuffigineqassanngilaq
KNR pisortat suliffeqarfiutigaat namminersortoq, taamaammat Naalakkersuisut nalinginnaasumik ilitsersuisinnaatitaanerisa avataani inissisimavoq.

Nivi Olsenip aamma erseqqissaatigaa radiukkut tv-kkullu aallakaatitsisarneq pillugu Inatsisartut inatsisaat naapertorlugu aningaasaliisartut ingerlatanut qanippallaamik akuliusimannginnissaat Inatsisartut kissaatigisimagaat.

Aamma atuaruk Ineqi: Politikerit qanoq KNR-mut akuliutsigisinnaappat

Taamaammat Inatsisartut Naalakkersuisullu nutaarsiassanik suliaqarneq imaluunniit radiokkut tv-kkulluunniit sunik aallakaatitsisoqarnissaa akuliuffigisinnaanngilaat.
 
 

Isumaqatigiissut naammassisussaavaa
KNR-ip innuttaasunik kiffartuussinissamik Naalakkersuisut isumaqatigiissuteqarfigai, tassanilu innuttaasunik kiffartuussinermi pisussaaffiit naammassineqartussat nassuiarneqarsimapput. Isumaqatigiissutip naammassineqarnissaa qulakkeerniarlugu Naalakkersuisut KNR-ip nakkutiginissaa akisussaaffigaat, taamaakkaluartorli politikerit aallakaatitassianut ataasiakkaanut akuliunnissaminnut periarfissaqanngillat.

Kultureqarnermut naalakkersuisup Nivi Olsenip aamma radiukkut tv-kkullu aallakaatitsisarneq pillugu Inatsisartut Inatsisaat innersuussutigaa, tassani erseqqilluinnartumik allassimammat siulersuisut qullersatut akisussaasuusut.