Nive Nielsen Canadami tusarnaartitsisaqattaartoq

Nunatsinni nipilersortartut nunani tamalaani ingerlalluarnerpaat ilaat, Nive Nielsen & The Deer Children, Canadami tusarnaartitsisaqattaarlutik angalaleruttorput. Nive nipilersoqatinilu ippassaq Musqueamimi tusarnaartitsipput ullumilu Vancouver tusarnaartitsissallutik.
Allattoq Peter Troelsen, Simon Uldum
januaarip 31-at 2014 08:18

Nive Nielsen & The Deer Children tusaamasami Rickshaw Theater North Fest 2014-imut tusarnaartitsissapput. Kingornalu Yukonimut ingerlaqqissapput. Nive Nielsen & The Deer Children maannamut British Columbiami illoqarfinni Kamloopsimi, Revelstokemi, Kewlonami Penticonimilu tusarnaartitsereerput.

Angalanerup siunertaasa pingaarnerit ilagaat nipilersoqatigiit Nive Nielsen & The Deer Children USA-mi angalallutik tusarnaartitseqattaarnissaat sioqqullugu erinarsuutit nutaat tusarnaartitsissutigalugit misilerarnissaat. USA-mi Californiami, Arizonami, Texasimi Geordiamilu tusarnaartitsissapput. Angalanermilu tassani nipilersoqatigiit nuusiaat nutaaq saqqummersinneqassaaq.

Pilersaarutillu iluatsissappata, Nive Nielsen & The Deer Children aamma Nunatsinni 2014-ip ingerlanerani ataasiarlutik arlaleriarlutilluunniit tusarnaartitsissamaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq