Niuertunngorniat siulliit naammassisut
KNI A/S-ip ilinniartitaaneq nutaaq Niuertunngorniarneq siorna aallartimmagu Pilersuisumi sulisut aqqaneq marluk aallartipput taakkulu tamarmik allagartartaarput.
Niuertunngorniartarneq qammatini qulingiluani sivisussuseqarpoq, peqataasullu piffissap taassuma ingerlanerani pingasoriarlutik Sisimiunut KNI-p kiffartuussiveqarfianut atuagarsoriartortinneqartarput. Niuertunngorniartut najukkaminni sulinermi nalaanni attaveqaatit atorlugit aamma suliakkersorneqartarput. KNI tusagassiorfinnut nalunaaruteqarluni taama allappoq.
Peqataasut nunaqarfimmi illoqarfimmiluunniit pisiniarfinni misilittagaqareersuupput, amerlanerillu ukiuni arlalinni Niuertutut sulereersimasuullutik.
Niuertunngorniarnermili peqataanermikkut annertuumik atuagarsornikkut aqutsineq, pilersaarusiorneq, niuertutut tamakkiisumik eqqarsarsinnaaneq, nalilersuisinnaaneq angusaqarusunnerlu itisilerlugit sammisimavaat.