Nittartakkakkut sullissivik atulerpoq

Namminersorlutik Oqartussat Kommuneqarfiillu ataatsimoorlutik innuttaasunut nittartagaat tallimanngornermi immikkut qaaqqusanut tusagassiortunullu ilisaritinneqarpoq. Nittartagaq tamatsinnut saaffiginnittuuvoq, tassanilu pisinnaatitaaffivut pisussaatitaaffivullu erseqqarissumik paasisaqarfigisinnaavagut. Aamma pisortat allaffeqarfiisa ammasarfiisa avataasigut sullinneqarneq nammitsinnik isumagisinnaalissallutigu.

Nittartagaq ukiuni arlalinni suliarineqareerluni naammassisumi paasissutissanik imaqarpoq, immersugassanik assigiinngitsunik skema-nillu ulikkaarpoq, inatsisinik atuuttunik imaqarluni, attavigineqarsinnaasut sumiinnerinik, kiisalu qarasaasiakkut attavissanik assigiinngitsunik imaqarluni.

Nittartagaq Kulturikkut Illorsuarmi Katuami ilisaritinneqarmat Ineqarnermut Attaveqarnermullu naalakkersuisoq, Jens B. Frederiksen, aamma KANUKOKA-mi siulittaasoq, Martha Abelsen, siuttuupput.

Nittartagartaaq sullissivik.gl-imik taaguuteqarpoq, internettimullu attaveqaruit akunnerup uuma naanerani iserfigisinnaavat.