Nipilersuutaa eqqakkanik katersisut

Qaammatimmi tamaasa tallimanngornerit aappaanni nalunaaqutaq ualikkut sisamaniit arfernup tungaanut Sisimiuni Kulturikkut illorsuarmi Taseralimmi tusarnaartitsisoqartassaaq.

Tusarnaartitsinermullu atatillugu innuttaasut elektronikkimi atortukutik atortorissaarutillu atorunnaakkat, soorlu qarasaasiatoqqat, batteriikut, eqqagassallu avatangiisinut akornusiisinnaasut allat, Taseralimmut tunniukkiartuutigisinnaavaat. Kommunip teknikkimut avatangiisinullu immikkoortortaqarfiata eqqagassat taamaattut isumagisassavai.

- Sisimiuni eqqaavissuaq ungasiartumiimmat, taama suliniuteqarnitsigut inuit elektronikimut tunngasunik igitassallit ajornannginnerusumik igitsisinnaanissaat siunertaraarput, nipilersornermut ilinniarfiup pisortaa, Jacob Froberg, radioaviisimut oqarpoq.

Tamatumunngalu misilittagaareersut pitsaasuupput.

- Eqqagassat ulorianartut tunniukkiartuutigalugit nipilersortunik tusarnaalaarnissaq inuit nuannarisarpaat, Jacob Froberg oqarpoq. Taassumalu aaqqissuussinerup sivitsorneqarsinnaanissaa neriuutigaa, taamaalilluni nipilersortunik tusarnaartitsineq unnukkut nanginneqarsinnaasunngorlugu.

- Eqqagassat avatangiisinut ajoqusiisinnaasut ilisimaneqarnerulernissaat pisariaqartinneqarpoq, nipilersornerlu tamatumunnga ikiorsiisinnaassappat tamanna nuanneqaaq, nipilersornermik ilinniarfiup pisortaa oqarpoq.

Eqqagassanik avatangiisinut navianartunik tallimanngornermi marsip ulluisa qulingiluaanni tulliani tunniussisoqarsinnaassaaq.