Nipiaa Rock Festivalit 17-issaat piareertoq
Nipilersornermik pikialaartitsineq septembarip aallaqqaataanit pingajuat ilanngullugu ingerlanneqassaaq, ukioq mannalu tusarnaartitsissut nunatsinneersuinnaapput.
Nipiaa Rock Festival nuannarineqartupilussuusarpoq Qeqertarsuullu tunuanit tusarnaariat imaaginnarvittarlutik, ilaat umiatsiamik angallatinillu mikisunik Aasiannukaasarput.
- Piareersarnerit aallartipput januaarimi Peqatigiiffik Inussuit – Nipilersortartut peqatigiiffiata aaqqissuussaq tusaamasaq tingummassuk Nipiaa Rock Festival siornatiguk aaqqissuisuinit, peqatigiiffiup Inussuit siulittaasuat Sakæus Petersen tusagassiorfinnut nalunaaruteqarluni taama allappoq.
Martin Løvstrømip sisamanngornermi septembarip aallaqqaataani pikialaartitsineq rock´n´roll-erluni ammaassavaa, ingerlatiinnarlugulu sakkortuunik nipilersortartut nuannarineqarluartut I124Q Kangersuatsiameersut appissallutik.
Nipilersoqatigiit Qinngorneq tallimanngornermi septembarip aappaani aallartittuussapput. Aasiammiut ”qanga” rockillammassuarnut aliannaarnialerput. Nipilersoqatigiit Qinngorneq ukiuni amerlasuunngortuni nipilersoqatigiissimanngillat, Aasiammiunullu appisimaartut takoqqinnissaat angisuujuvoq.
Liima Inui kingorna appissapput nuuteeraq saqqummersitartik "INRI" saqqummeqqaarneranniit siullermeertumik appittussanngorlutik. Tallimanngornerlu Zikazakkunnik naggaserneqassaaq.
Arfininngorneq ukiunik 40-nngortorsiortut aallarnissavaat, tassalu nipilersoqatigiit Aasiammiut nuannarineqarluartut Inneruulat.
Kingorna nipilersoqatigiit Kalak nutaanik nutaanngitsunillu appisimaassapput.
Ole Kristiansenip saqqummersitaa Pop Uummataaruffimmi ukioq manna ukiunik 25-inngortorsiorpoq, Ole Kristiansenillu nuuteeqqami nipilersoqataasut ilagalugit nipilersornermik pikialaartitsineq Nipiaa Rock Festival 2016 naggasissavaa.
Aaqqissuisut ilanngullugu oqaatigaat aaqqissuussap iluani tupaallannartunik pisoqarumaarpoq, maannakkulli saqqummiunneqassanngitsut, tusarnaarialli qilanaakuttuuginnarsinnaasut.
